Украина треба да се сети дека добива помош од Полска, изјави полскиот претседател Анджеј Дуда, во услови на продлабочување на спорот меѓу земјите околу увозот на земјоделски производи, пишува Ројтерс.

Додека Полска останува цврст поддржувач на Украина во лицето на руската инвазија, двете земји се во несогласување околу неодамнешното продолжување на Полска на забраната за увоз на украински житарки, за кои Варшава вели дека е потребна за заштита на нејзините фармери.

„Би било добро Украина да се сети дека добива помош од нас и да запомни дека и ние сме транзитна земја кон Украина“, изјави Анджеј Дуда на новинарите во Њујорк по обраќањето пред Генералното собрание на Обединетите нации.

Полска, Словачка и Унгарија објавија ограничувања на увозот од Украина во петокот, откако Европската комисија одлучи да не ја продолжи забраната за продажба во петте соседи на Украина кои се членки на ЕУ, меѓу кои се и Романија и Бугарија. Забраната беше воведена откако земјите забележаа поплава од евтин увоз од Украина, бидејќи таа се бореше да испорача жито во подалечните земји.

Додека Украина во вторникот апелираше за „конструктивен дијалог“, портпаролот на Светската трговска организација потврди дека Киев го направил првиот чекор во трговскиот спор со поднесување жалба до глобалното трговско тело.

Дуда рече дека доколку Украина ја поднесе жалбата, Полска ќе ја објасни ситуацијата пред Трибуналот.

Тој подвлече дека забраната се однесува на увозот, но не и на транзитот на украинското жито.

„Постојат деловни кругови кои имаат интереси во Украина и би сакале да продаваат жито што е можно побрзо по најниска можна цена. Мораме да се браниме од тоа“, рече тој.