По појавата и ширењето на коронавирусот, цените на заштитните медицински маски пораснаа и до 10 пати, како малопродажните во аптеките, така и големопродажните по кои набавуваат здравствените установи. Според документ до кој дојде “Слободен печат”, пред појава на заразата, болниците маските ги купувале по 2,28 денари, додека сега нивната цена по парче е 28, 5 денари.

Овие маски се за еднократна употреба, по што маската треба да се фрли и да се замени со нова. Простата математика покажува дека цената на маските пораснала за повеќе од 10 пати. Во аптеките, пак, овие маски порано се продаваа околу 3-5 денари, а сега се најмалку 30, а некаде и 50 денари. Искуството на стоматолозите говори дека маски кои порано ги купувале по 250 денари сега се и по 750 денари.

– Ова однесување е безобразно и крајно општествено неодговорно. Треба да се најде начин да се спречи ваквото профитерство – реагираат граѓаните.

Родителите, пак, реагираат дека покрај маските поскапеле и витаминските сирупи кои им ги даваат на децата за подобрување на имунитетот во услови на ширење на заразни заболување како што е коронавирусот. Така, сирупче кое чинело 200 денари, сега чини речиси 300 што е зголемување за 50 отсто. Решение за овој проблеми требаше да понудат инспекциските служби но, оттаму велат дека во овој дел, односно кога се во прашање медицински материјали и помошни средства за лекување, цените ги формира пазарот односно понудата и побарувачката така што не може да интервенираат.

За разлика пак од нив, цените на лековите се единствени и ги утврдува Агенцијата за лекови поради што тука не може да има поголеми неконтролирани отстапувања. Познавачите на состојбите пак велат дека не е точно дека државата не може да реагира особено во ситуација во која се наоѓаме сега борејќи се со голема опасност која може да однесе многу животи.

– Како што владата донесе одлука да забрани ивоз на медицинските апарати и материјали и лекови така може во овој период да донесе одлука и да ги контролира цените на одредени производи кои се важни за справување со коронавирусот, особено спречување на негово ширење – велат извори на Слободен печат од јавното здравство.

Се поставува и прашањето каде после овие маски се фрлаат зошто ако тоа се прави несоодветно тие како отпад може да станат извор на зараза.