Во единственото државно средно училиште за ученици со оштетен слух во земјава „Партенија Зографски“ предаваат наставници кои воопшто не го познаваат знаковниот јазик или пак не го познаваат доволно, покажа анализата направена од канцеларијата на Народниот правобранител.

Васка Бајрамовска – Мустафа, заменичката на Народниот правобранител рече дека нивната анализа покажала дека ниту еден наставник го нема шестото највисоко ниво на познавање на знаковниот јазик, иако обуките за наставниците се бесплатни.

„Особено загрижува фактот што постојат наставници кои не го знаат воопшто, а има и такви кои се на почетно ниво на изучување на знаковниот јазик. Иако дел од нив веќе подолго време се вработени во училиштето односно имаат повеќе години работно искуство во училиштето. Во учебната 23/24 година тројца наставници почнале почетна обука. Прво ниво на обука имале завршено тројца наставници, за жал дури двајца од нив се со стаж од 15 години односно 20 години. Двајца вработени завршиле второ ниво на обука и четворица со трето ниво на обука. Со завршено четврто ниво имало деветмина вработени, а е петто ниво на обука имале завршено четворица наставници. За жал ниту еден од вработените нема завршено шесто ниво ниво на обука на знаковен јазик. Во оваа учебна година податоците што ги обезбедивме покажуваат дека нема значителни промени. Напредување во следно ниво има кај вкупно шестмина наставници и тоа еден од вработените од второ ниво преминал на трето, двајца од трето преминале на четврто ниво, двајца од четврто преминале на петто ниво, а еден наставник кој бил петто ниво во меѓувреме се стекнал со сертификат за толкувач. За жал сите останати наставници и воспитувачи се на истото ниво на познавање на знаковниот јазик како и минатата учебна година“, рече Бајрамовска-Мустафа.

Таа додаде дека во училиштето има двајца вработени со оштетен слух. Едниот работи како воспитувач, додека пак а другиот е наставник по практична настава чиј мајчин јазик е знаковниот јазик, согласно барањата на Конвенцијата за првата на лицата со попреченост.

Претставниците на Омбудсманот за разговорите со учениците ангажирале сертифициран толкувач при што откриле дека најголем дел наставници наставата ја изведуваат вербално, со пишување на табла или пак со споделување печатени материјали кои на учениците не им се доволно јасни. Оценувањето, пак, според учениците, било лотарија и немало никакви критериуми.

„При проверка на знаењата, односно за време на испрашувањето, учениците кажаа реченици од типот „нашето оценување е како лотарија, ставаат двојки, тројки, четворки, петки без да ни го проверат знаењето. Доволно е само да го препишеме тоа што го пишуваат на табла“. Дополнително укажаа дека одговараат со помош на соученик кој е наглув и кој добро го знае знаковниот јазик и во една таква состојба, ваквиот ученик има улога на толкувач“, вели Бајрамовска – Мустафа и додаде дека има отсуството на самодоверба кај учениците за да се запишат на факултетски студии.

Во „Партенија Зографски“ оваа учебна година има вкупно 45 ученици, што е за шест ученици повеќе отколку минатата учебна година.

Денеска, по повод Денот на лицата со попреченост, Народниот правобранител испрати препораки до училишниот центар и до Министерството за образование за преземање итни мерки кои ќе им овозможат на учениците со оштетен слух да добијат образование на знаковен јазик.

На училиштето му препорача да обезбеди сертифицирани толкувачи на знаковен јазик во наставата со цел ефикасна и квалитетна комуникација со учениците и соодветно пренесување на наставните содржини.

На Министерството за образование, пак, Омбудсманот му препорача да изнајде системско решение за проблемот со непознавање на знаковниот јазик на начин што ќе го уреди познавањето на знаковниот јазик како задолжителен за наставно – воспитниот кадар кој е во секојдневен контакт со учениците со оштетен слух, но и соодветно познавање на знаковниот јазик за сите останати наставни работници согласно работното место.

Министерството за образование, училишниот центар и здруженијата на граѓани заедно препорачаа одржување на задолжителни континуирани обуки за вработените за изучување на знаковниот јазик преку кој ќе се зајакнат и подобрат вештините на употреба на знаковниот јазик во комуникацијата со учениците.