25-годишна тетовчанка, која работи како касиерка во казино во градот, е казнета поради тоа што во нејзината каса биле пронајдени евра, соопшти МВР. Ова се случило во Тетово, каде во речиси сите продавници (со исклучок на маркетите од големите синџири), бутици, кафеани, бензински пумпи редовно се наплаќа во евра, посебно во летните месеци.

За кривичното дело кое ѝ се става на товар на девојката по „акциската контрола“ во таа една коцкарница за која јавува полицијата, предвидена е затворска казна од шест месеци до пет години.

„СВР Тетово поднесе кривична пријава против правно лице – друштво за трговија, обложување и приредување на игри на среќа од Тетово и против Д.С.(25), вработена како касиер во правното лице, поради постоење основи на сомнение за сторено кривично дело „недозволена наплата или исплата во ефективни странски пари“ од Законот за девизно работење. На 23/24.04.2025 извршена е акциска контрола во пријавеното правно лице, каде била затекната пријавената Д.С., при што во касата биле пронајдени и одземени девизни парични средства, при што пријавените постапиле спротивно на Законот за девизно работење со недозволена наплата или исплата во ефективни странски пари“, велат од полицијата.