На повидок е решавање на проблемот со кучињата скитници во Тетово. Неодамна започна со работа стационарот за згрижување на бездомните животни кое општинските власти го промовираа пред медиумите. Се работи за прифатилиштето за бездомни кучиња на Друштвото за грижа на бездомни кучиња АНА АГРО ДООЕЛ во Ратае, со кое општината потпиша едногодишен договор за Програма за спроведување и решавање на проблемот со бездоми животни врз основа на јавна набавка.

Според договорот, општината има одредено 2.542.372 денари за 12 месечното третирање на бездомните животни.

„Кучињата бездомници ќе бидат подложени на максимален хуман третман кој опфаќа нивно заловување, транспорт до болница, прием и преглед од овластен ветеринар, тест за социјализација, лабораториски преглед за одредени болести, идентификација и водење евиденција (чипирање), стерилизирање, кастрирање, сместување, постоперативна нега, како и соодветна вакцинација, изјави градоначалникот на Општина Тетово Билал Касами во прифатилиштето.

Од прифатилиштето велат дека приоритет ќе биде да се заловат и третитаат агресивните и болни кучиња за кои добиваат многубројни пријави од граѓани.

„Кучињата кои ги третираме поминуваат тест за социјализација на два пати и доколку не го помине, оди на еутаназија. Тоа се прави на трет ден од заловување и после оперативен зафат. Исто така се вакцинираат, се чистат од паразити и им се става идентификациски микрочип. По третирање на кучињата ако некој не ги вдоми, треба да се вратат на локација, по што ќе има наредна тура“, информираше Апостоловски.

Прифатилиштето има капацитет од 19 „боксови“ за кучиња.

Тетово со децении мака мачи со кучињата скитници. Веќе подолго време тие не се третираа, а во градот се зголеми бројката на бездомните животни кои се сè поагресивни.

Кучињата скитници страв и трепет низ Тетово, општината со ветување дека ќе ги згрижи во стационар