Тимови од Институтот за судска медицина од синоќа вршат обдукција на телата на починатите што настрадаа во несреќата што се случи во дискотеката во Кочани, потврдуваат за „Слободен печат“ од Институтот.

Последната официјална бројка на загинати е 59, но од Институтот не прецизираат бројка на колку тела се врши обдукција.

Иако родителите синоќа пред кочанската болница не ги даваа телата на нивните деца да се изврши обдукција, сепак на крајот тензиите се смирија, со оглед на тоа што законски мора да се изврши обдукција на телата на починатите за да моќе понатаму да тече кривичната постапка.

Институтот за судска медицина треба да изврши идентификација и да ја утврди точната причина за смртта за потоа телата да им бидат предадени на родителите за погреб. Понатаму за причините за смртта треба да извести Обвинителството, согласно информациите што ќе ги добие од Институтот.