Во среда свечено ќе се отвори новата зграда на Општина Карпош
Од Општина Карпош информираат дека во среда во 19:00 часот, свечено ќе биде отворена новата зграда на Општина Карпош.
Препорачано
Градоначалникот Стевчо Јакимовски истакна дека по завршувањето на приклучоците од страна на ЕВН КЕЦ – Ѓорче Петров, новата зграда на Општина Карпош, конечно, е осветлена.
Тој додаде дека овој модерен и енергетски ефикасен објект, кој се простира на површина од 4.500 квадратни метри, претставува едно од најзначајните вложувања во локалната самоуправа, изграден за граѓаните на Карпош и во согласност со нивниот однос кон својата општина.
– Со современ ентериер, кабинети и со комплетно функционален приземен дел, новата зграда е изградена во согласност со потребите на локалната самоуправа и на граѓаните. Со овој капитален проект, Општина Карпош ја потврдува својата определба за создавање современи, функционални и енергетски ефикасни јавни објекти, во кои граѓаните ќе може да ги остваруваат своите права и услуги во услови достојни за еден европски град – се вели во соопштението на локалната самоуправа.
Во новоизградената општинска зграда веќе се преселени дел од администрацијата и од канцеларијата на градоначалникот, кои досега беа сместени во првата барака, а следниве денови постепено ќе се врши преселба на канцелариите и на вработените од втората барака во новиот објект.
