Почитувачи на усташите и фашистичката држава НДХ на Анте Павелиќ вчера, облечени во црни кошули, маршираа низ улиците на вториот по големина хрватски град – Сплит, а на собирот, организиран по повод „Денот на независната држава Хрватска“ и формирањето на воен одред, им се придружија околу 200 граѓани, јавуваат регионалните медиуми.

Покрај споменикот на загинатите припадници на ХОС, тие го одбележаа и основањето на баталјонот на хрватските вооружени сили „Рафаел Витез Бобан“, притоа извикувајќи го усташкиот поздрав „За дом спремни“. Порачаа дека нема да се откажат, иако се најавени казни од дури 4.000 евра.

Пензионираниот мајор на хрватската војска, Миќа Ќук, изјави дека поздравот „За дом спремни“ „им пречи на непријателите на Хрватска и на навивачите на црвената ѕвезда-петокрака“.

Сплитската полиција денеска соопшти дека е поднесена кривична пријава против двајца организатори на собирот, откако врз основа на истрагата е утврдено дека на тој собир имало „нарушување на јавниот ред и мир со испраќање пораки и извици со недолична содржина на јавно место“.

„Врз основа на утврдената фактичка состојба, против две лица ќе биде поднесен обвинителен акт поради сомнение дека го прекршиле член 5 од Законот за прекршоци против јавниот ред и мир“, соопшти сплитската полиција.