Неколку стотици симпатизери на партијата Продолжуваме со промената (ПП) на експремиерот Кирил Петков попладнево се собраа на протест пред претседателската резиденција во Софија, на кој побараа оставка од бугарскиот претседател Румен Радев, јавува mediapool.bg.

Тие му испратиле порака на шефот на државата дека „Овде не е Москва“, дека „Бугарија е со Украина“ и сакаат да бидат дел од Европа, а не повторно да бидат под капата на Советскиот сојуз. Демонстрантите носеле знамиња на Бугарија, Европската Унија и Украина.

Протестот бил организиран на социјалните мрежи под наслов „Бугарија е парламентарна република и полноправна членка на ЕУ и НАТО“, а на него учествувале и членови на граѓанското движење „Ботс“, кои собираат потписи за смена на Радев од претседателската функција.

Како што јавуваат медиумите, причина за револтот на граѓаните е вчерашната изјава на Радев дека не е соодветно да им го врачи мандатот за состав на влада на ПП-ДП, но дека ќе го почитувал Уставот. Тој се повика на претходно протечени аудиозаписи од состанок на раководството на Продолжуваме со промената.

Копретседателите на ПП, Кирил Петков и Асен Василев биле поздравени со аплауз од учесниците на протестот.

„Вистинскиот гарант на демократијата сте вие ​​и ви благодарам што сте тука. Фактот дека во Бугарија постои граѓанско општество кое кога ќе види напад на демократијата, на парламентарната република и ќе го пополни плоштадот е вистинската гаранција дека тоа што успеваме да го промениме останува изменето. Луѓето кои се обидуваат да ги вратат старите системи, старите безбедносни служби кои од утро до вечер работат на правење компромитирачки работи, навистина чувствуваат дека го трошат своето историско време“, изјавил Петков пред насобраните граѓани.

„Бугарија нема пат кон Евроазија и Исток, туку ќе биде нормална европска земја“, додал Петков.