Во рамките на тридневниот музички „саем“ во Скопје, што се одржува од 28 до 30 ноември, на 11. издание на ПИН музичка конференција и шоукејс фестивал пристигнуваат повеќе од 500 делегати, професионалци од музичката индустрија и експерти од целиот свет, а ќе се одржат и 60 концерти во МКЦ, со бесплатен влез за сите посетители.

ПИН е единствен интернационален настан што го претвора Скопје во центар на европската музичка индустрија, ги поврзува сите релевантни двигатели на сцената и ги поместува границите нудејќи разновидна палета на жанрови преку своите панели, работилници и перформанси.

ПИН е прослава на трансформативната моќ на музиката, каде што се споделува знаењето, се создаваат мрежи на идна соработка и одекнува ритамот на креативноста.

За време на овие три дена, Скопје ќе биде домаќин на повеќе од 500 културни професионалци од целиот свет (менаџери, букери, промотори, организатори и т.н.); 60 концерти на 6 бини; промоција на македонската музичка сцена со повеќе од 30 отсто македонски артисти во програмата; бесплатен влез за сите посетители и бројни едукативни содржини.

Програмата почна на 28 ноември со панелите „Најдолгиот пат од права до пари“ и „Креативна Културна Европа“ со бугарскиот министер за култура како специјален гостин. Церемонијата за официјалното отворање на ПИН во Младинскиот културен центар е во 19 часот, а потоа ќе следуваат концертните перформанси.

На конференциската програма на ПИН, како говорници, предавачи и модератори учествуваат најголемите ѕвезди од зад сцената, светски менаџери, организатори на најзначајните фестивали во Европа, музички агенти, експерти за извоз на музика, промоција и развој на музичките кариери, кои ќе дискутираат на топ-теми во индустријата, трендови поврзани со музичката сцена, продукцијата, културата и сите влијанија врз неа.

Концертната програма ќе се одвива на шест различни сцени во Младинскиот културен центар, а годинава македонската публика ќе има неверојатна прилика со бесплатен влез да ужива на 60 концерти! Артистите кои ќе настапат на ПИН доаѓаат од сите страни на светот, од повеќе од 30 земји, од цела Европа, па сѐ до подалечните, како Јапонија, Буркина Фасо, Мали и Конго.

Станува збор за значајни интернационални имиња особено од светската музика, но и најдобрите млади уметници кои ја трасираат новата квалитетна музичка сцена во различни алтернативни и популарни жанрови. Само дел од овие атрактивни музички имиња се Бубакар Траоре, Лука Рајиќ, Аваланш Каито, Берлин Менсон, Ида Престер, Хелем Нејсе, „Фули Мизики“, македонските одлични претставници „Пичвајз“, „Хајка“, „Занаду“, Галатеа, Огнен Златанов и десетици други.

ПИН музичката конференција и шоукејс фестивал се одржува како дел од програмата на „Таксират Фестивал“, а во организација на „Пасворд Продакшн“.