Уште тројца мотоциклисти завршија во болница во Скопје, откако се судриле со автомобили – едниот имал судир со „БМВ“ вчера во населбата Бутел, соопшти МВР.

„На 04.09.2025 околу 20:10 часот во СВР Скопје било пријавено дека на бул.„Христијан Тодоровски-Карпош“ во Скопје се случила сообраќајна несреќа помеѓу патничко возило „бмв“ со скопски регистарски ознаки, управувано од Е.К.(21) од с.Љуботен, скопско и мотоцикл со скопски регистарски ознаки, управуван од Т.А.(28) од Скопје. Во несреќата со тешки телесни повреди се здобил мотоциклистот, констатирани во Комплексот клиники „Мајка Тереза“. Извршен е увид од екипа од СВР Скопје“, пишува во полицискиот билтен.

Во вториот случај, тешко се повредени возач на мопед и негова сопатничка, кои се судриле со автомобил „Сузуки“ во Ново Село.

„На 04.09.2025 во 21:55 часот во СВР Скопје било пријавено дека на ул.„100“ во с.Ново Село, скопско, се случила сообраќајна несреќа помеѓу патничко возило „сузуки свифт“ со скопски регистарски ознаки, управувано од А.М.(24) и мопед со скопски регистарски ознаки, управуван од В.Ш.(26), двајцата од Скопје. Во несреќата со тешки телесни повреди се здобиле В.Ш. и неговата сопатничка И.В.(27) од с.Волково, скопско, констатирани во Комплексот клиники „Мајка Тереза“, велат од МВР.