Делегации од САД и Русија од понеделник наутро се во хотел во Ријад, каде разговараат за деталите за можниот прекин на огнот во Украина.

Според агенцијата РИА Новости, состанокот на експертите од „техничките групи“ на владите на двете земји се одржува зад затворени врати.

Службата за државна безбедност на Саудиска Арабија побара од новинарите да ги напуштат сите области на хотелот.

Русија во преговорите ја претставуваат шефот на Меѓународниот комитет на Советот на Федерацијата, Григориј Карасин и советникот на директорот на ФСБ, Сергеј Беседа. Американскиот тим е предводен од пратеникот на претседателот Доналд Трамп во Киев, Кит Келог.

Дијалогот е посветен на црноморската иницијатива. Кремљ не исклучува дека на средбата може да се разговара и за други аспекти поврзани со украинското решение.

Во неделата, делегацијата од Вашингтон се сретна во Ријад со својот колега во Киев, во кој беа заменик-началникот на Генералштабот на Зеленски, Павло Палиса, и поранешниот началник на Генералштабот на вооружените сили на Украина и актуелен генерален инспектор на Министерството за одбрана на Украина, Анатолиј Баргилевич.

Според информациите, не се закажани средби меѓу руската и украинската делегација.

Украинците оптимисти

Разговорите меѓу украинските и американските претставници во Ријад, со цел можен договор за делумен прекин на непријателствата – во врска со енергетската инфраструктура – во војната меѓу Русија и Украина, беа „продуктивни“, изјави вчера  украинскиот министер Рустем Умеров.

„Го завршивме нашиот состанок со американскиот тим. Дискусијата беше продуктивна и фокусирана. Ги допревме клучните точки, особено енергијата“, рече Умеров во пресрет на руско-американските разговори, додавајќи дека Киев ја следи својата цел за „праведен и траен мир“.

Денешните разговори меѓу американските и руските претставници Кремљ ги оценува како „тешки“.

Украинскиот претседател Володимир Зеленски од своја страна побара синоќа преку социјалните мрежи да се изврши „притисок“ врз неговиот руски колега Владимир Путин да даде „вистинска“ наредба за „запирање на бомбардирањата“, додавајќи дека „оној што ја предизвика оваа војна мора да ја прекине“ и дека Русија „е единствената што ја продолжува војната“.

Last night in Kyiv, tragically, three people were killed by Russian drones, including a father and his five-year-old daughter. Just a day earlier in Zaporizhzhia, a Russian strike took the lives of an entire family—a mother, a father, and their daughter. My condolences to all the… pic.twitter.com/hB6R5yn9gV

— Volodymyr Zelenskyy / Володимир Зеленський (@ZelenskyyUa) March 23, 2025

Специјалниот пратеник на американскиот претседател Доналд Трамп, Стив Виткоф, сакаше да звучи оптимистички пред денешните разговори, нагласувајќи дека очекува „вистински напредок“.