Во вчерашниот пожар пред влезот на селото Отовица во близина на велешкото езеро „Младост“ изгореа педесет хектари сува трева, нискостеблеста шума, багреми и дел борчиња.

Во гаснење на пожарот биле вклучени 16 пожарникари со пет противпожарни возила, една цистерна со двајца вработени од ШС „Бабуна“ и девет вработени од ЈКП „Дервен“ и месното население. Во гаснење на пожарот се вклучи и еден хеликоптер на МВР и два авиони на Дирекцијата за заштита и спасување.

СВР Велес ќе истражува кои се причините за пожарот, изјави за МИА портпаролот Ристе Самарџиев.

Пожарот бил пријавен во 13:30 часот, а изгаснат во 19:40 часот, но екипа на Територијалната Противпожарна Единица од Велес со шест пожарникари и едно противпожарно возило синоќа беше оставена на терен за секој случај.

– Во едно време имало опасност и по куќите во селото, но брзата и навремена координирана акција на сите надлежни, а и со поддршка од полицијата и локалната власт и градоначалникот Марко Колев, ЈКП „Дервен“, ШС Бабуна и месното население го спречи проширувањето на пожарот, велат од РЦУК Велес.

Надлежните се сомневаат дека како и во изминатиот пожар на истата локација од 31 јули годинава причина е фрлен отпушок од цигара на автопатот Велес – Скопје, а потоа пожарот се проширил. Но тогаш пожарот беше помал и побрзо беше изгаснат и имаше помала штета. Од полицијата велат дека затоа тешко може да го открие сторителот на пожарот.

ВИДЕО: Се гаси пожарот над велешко Отовица со три летала, запален веројатно од отпушок од цигара