Основното училиште „Лазо Ангеловски“ во Ново Лисиче,  едно од најголемите училишта во Македонија, добива нов пристапен лифт наменет за учениците со попреченост, со што, како што информираат од Општина Аеродром, се финализира уште еден важен циклус на инвестиции со кои ова училиште станува целосно инклузивно, со еднаков пристап за сите ученици.

Градоначалникот Тимчо Муцунски на Фејсбук соопшти дека инвестициите во образовната инфраструктура се реализираат со средства од буџетот на општината.

Голем дел од учениците во Македонија се соочуваат со пречки во образованието затоа што се различни. Преку инвестициите во унапредување на образовната инфраструктура настојуваме да ги отстраниме сите потешкотии со кои се среќаваат и да создадеме пристапен образовен процес преку кој ќе се исполни потенцијалот на секое дете, вели Муцунски.

Во ова основно училиште, во изминатиот период се реализираа низа инвестиции кои го подигнуваат нивото на инклузивност и овозможуваат еднакви услови за сите. Со поставувањето на овој лифт, се заврши инвестицискиот циклус во кој училиштето доби инклузивни тоалети, пристапни рампи, тактилни патеки и знаци.