По повод одбележувањето на интернационалниот ден на жената „8 Март“, Националната и универзитетска библиотека „Св. Климент Охридски“ во Скопје на 7 март (петок), во 12 часот, во холот на НУБ ќе ја отвори традиционалната изложба „Убавите жени во мојот народ“. Авторки на изложбата се Марина Мијаковска, Елени Новаковска и Искра Димитрова.

На изложбата ќе бидат презентирани материјали од Збирката со современи авторски ракописи, Збирката за музичка уметност и Збирката за ликовни уметности при НУБ. Од Збирката со современи авторски ракописи ќе бидат презентирани манускрипти од првите македонски писателки: Евгенија Шуплинова, Радмила Трифуновска, Светлана Христова-Јоциќ, Драгица Најческа и Гордана Михаилова-Бошнакоска.

Исто така, ќе бидат изложени и првите печатени книги на овие авторки. Од Евгенија Шуплинова ќе бидат презентирани песните во ракопис „Ти“, „Вечерна молитва“, „Допирнувања“, „Вечер ќе ти дојдам пак“ и „Сè“. Од Радмила Трифуновска ќе бидат изложени манускриптите „Апел“ и „Низ мене дете летна в небо“.

Творештвото на Светлана Христова-Јоциќ ќе биде презентирано преку песните во ракопис „Кобилица“, „Амкање“, „На камен“ и „Плашило“. Од Драгица Најческа ќе бидат поставени песните во ракопис „Црвено“ и „Доцна“, а од Гордана Михаилова-Бошнакоска песните во ракопис „Езеро“, „Нејзиното четврто писмо“, „Школка и бисер“ и „Да се спасиме од минливоста“.

Збирката за музичка уметност ќе претстави дела на креаторките на македонската музичка и балетска сцена, преку аудиоснимки (грамофонски плочи и компакт дискови), партитури, монографски публикации. Во спектарот на убавите жени се издвоени Милка Ефтимова, Нина Спирова, Есма Реџепова, композиторките Јана Андреевска, Дарија Андовска, како и научните работнички кои ја истражуваат и архивираат музичката и балетската уметност, како Родна Величковска, Емилија Џипунова, Соња Здравкова-Џепаровска и други.

Од Збирката за ликовна уметност ќе бидат презентирани со по две дела реномираните уметнички Анета Светиева и Славица Јанешлиева. Но, со мноштво издадени публикации ќе се вклучени и авторките кои се насочиле кон истражување и пишување за визуелната уметност во Македонија, како Вера Битракова, Соња Абаџиева и Елизабета Димитрова.

Координатор на изложбата „Убавите жени во мојот народ“ е Зорица Јаковлеска-Спировска. Изложбата ќе ја отвори директорот на НУБ „Св. Климент Охридски“, Јовица Никчевски.