Во судирите меѓу полицијата и хулиганите во пресрет на дербито во Рим, Италија, помеѓу фудбалерите на Лацио и Рома, повредени се 24 полицајци, а воедно причинета е и материјална штета од 40.000 евра.

Околу 2.000 полицајци беа распоредени на различни точки околу стадионот „Олимпико“ во Рим, а конфликтот започна кога навивачите на Лацио се обидоа да го пробијат полицискиот кордон.

Навивачите фрлаа ракети и тврди предмети кон полицијата, која одговори со солзавец и водени топови.

– Згрозен сум. Неприфатливо е што хулиганите го трансформираат фудбалскиот натпревар во сцена на урбана војна – рече градоначалникот на Рим, Роберто Гвалтиери.

Натпреварот, чиј домаќин беше Лацио заврши нерешено 1:1, а двата клуба издадоа соопштенија во кои изразија солидарност со повредените полицајци и го осудија насилството од страна на хулиганите.