Британската полиција соопшти дека меѓу жртвите на новогодишниот напад во Њу Орлеанс е и Британецот Едвард Петифер,(31) од Лондон, чија маќеа била дадилка на принцот Вилијам и принцот Хари. Тој беше меѓу 14-те лица убиени од американскиот воен ветеран лојален на Исламската држава, кој со својот камион влета во толпата која ја славеше новогодишната ноќ.

-Целото семејство е уништено од трагичната вест за смртта на Ед во Њу Орлеанс –  соопшти неговото семејство, според соопштението на лондонската полиција. Извор од кралското семејство рече дека кралот Чарлс бил длабоко тажен поради смртта на Петифер и дека бил во контакт со неговото семејство за да му изрази лично сочувство.

Таткото на Петифер, Чарлс, поранешен британски офицер, се ожени со Тиги Лег-Бурк во 1999 година, набргу откако таа престана да биде дадилка на Вилијам и Хари. Семејството остана блиско со британското кралско семејство, а полубратот на Петифер беше кум на свадбата на принцот Вилијам во 2011 година.