Најмалку 38 палестински цивили се убиени, а десетици ранети од утрово во израелски напади врз неколку области во Појасот Газа, соопштија медицински извори.

Според изјавите на болничкиот персонал, 23 тела се префрлени во болницата Ал-Шифа, 12 во болницата Ал-Мамуд и три во болницата Ал-Акса, објави Вафа.

Повеќе од 40 ранети лица се примени на лекување, од кои многумина се во критична состојба.
Нападите биле насочени кон станбени области, вклучувајќи ги областите северозападно од градот Газа, населбите Ал-Дараџ и Ал-Сабра, како и централниот дел од Појасот Газа, вклучувајќи го и бегалскиот камп во Деир ал-Балах.

Болницата Ал-Шифа потврди дека осум лица, меѓу кои жени и деца, се убиени, додека околу 40 лица се повредени во напад врз населба во западниот дел на Газа.
Две деца беа убиени, а неколку други беа ранети кога беше погодена семејната куќа на Масуд во источната населба Ал-Дараџ.

Четири лица беа убиени во населбата Ал-Сабра, додека болницата Ал-Акса во Деир ал-Балах ја потврди смртта на три лица во напад врз стан во бегалскиот камп.

Во друг напад, седум цивили беа убиени, а повеќе од 20 беа ранети кога израелските сили нападнаа точка за дистрибуција на хуманитарна помош јужно од Газа.

Нападите продолжија и на други локации во централниот дел од Појасот Газа.

Според извештаите, неколку цивили сè уште се под урнатините.

Израел не коментираше за последните напади.