Припадници на српското МВР и Техничката дирекција на Службата за борба против високотехнолошки криминал, учествуваа во меѓународна операција на Министерството за внатрешни работи на Обединетите Арапски Емирати насочена кон борба против сексуалната експлоатација и злоупотреба на деца на интернет, во која беа спасени 165 жртви, а 188 осомничени беа уапсени помеѓу 10 јули и 31 август оваа година, пренесува Н1.

Во операцијата во која учествуваа полициски сили од 15 земји, привремено беа запленети 153 електронски уреди, а 113 кориснички сметки беа затворени, соопшти министерот за внатрешни работи Ивица Дачиќ.

Поднесени се шест кривични пријави против шестмина врз основа на тоа што подолг временски период преку интернет преземале, складирале и споделувале содржина создадена преку експлоатација на деца за порнографски цели.

Кривични пријави за кривично дело прикажување, добивање и поседување порнографски материјал и експлоатација на малолетно лице за порнографија се поднесени против граѓани на Суботица, Пожаревац, државјанин на Руската Федерација со привремена дозвола за престој во Нови Сад, од Смедеревска Паланка, Смедерево и Жабар.

Фокусот на оваа меѓународна операција беше на откривање на целиот спектар на онлајн експлоатација, од создавање, поседување и дистрибуција на материјал за сексуална злоупотреба на деца до сексуална изнуда, злоупотреба во живо и случаи на содржина генерирана од вештачка интелигенција.

„Оваа акција уште еднаш покажува дека српското Министерство за внатрешни работи, во соработка со меѓународните партнери, има сила и знаење да застане на патот на најсериозните форми на високотехнолошки криминал. Заштитата на децата и нивната безбедност на интернет е наш апсолутен приоритет и нема да има компромиси во овој поглед“, нагласи министерот Дачиќ.

Генералниот директор на Бирото за меѓународни работи на Министерството за внатрешни работи на Обединетите Арапски Емирати, Дана Хумаид Ал Марзуки, изјави дека оваа меѓународна операција ја демонстрира моќта на меѓународната солидарност во одбраната на децата.

„Преку оваа координирана операција, не само што ги разбивме криминалните мрежи, туку им дадовме и надеж на децата кои страдаа во тишина. ОАЕ се горди што ги собраа партнерите од целиот свет за да докажат дека ниедна граница, ниедна мрежа и ниедна технологија нема да ги заштити од правда оние кои им штетат на невините“, изјави генералниот директор на Бирото за меѓународни работи на Министерството за внатрешни работи на ОАЕ.