Претседателот на Собранието Африм Гаши деновиве ќе го закаже првиот брифинг со новинарите за работата на Собранието, откако е назначен за втор човек во државата, но јасно е дека главна тема ќе биде „сватовската колона од шест службени и приватни возила кон Косово“, предводена од првиот парламентарец, која на брза лента, без проверка, била пуштена на преминот Блаце, дознава „Слободен печат“ од собраниски извори.

Иако одењето на Гаши со семејството по невеста во Косово неколку денови ја тресе јавноста, претседателот на Собранието досега не се огласи дали смета дека ја злоупотребил службената положба, дали ќе поднесе оставка од спикерското столче или за неколкуте скандали во двомесечното раководење со Собранието ќе ја чека интерпелацијата која веќе е закажана за 3 септември.
Според досегашните најави и навестувања од пратеничките групи, јасно е дека Гаши ќе ја преживее интерпелацијата поднесена од опозициската Левица, а зад која досега застана само СДСМ.

Од Кабинетот на Гаши наместо издржан одговор оценија дека тривијална е дебатата дали претседателот на Собранието треба приватно да патува. Но тоа ниту еден медиум не го спори. Според кабинетот,  по осамостојувањето на земјава, вакви прашања никогаш не биле покренати како значајна тема на јавен интерес.

-Ова е првпат да бидеме сведоци на ваков обид за дискредитација на јавна личност. Претседателот на Собранието заедно со други високи функционери и нивните семејства се под постојан безбедносен надзор. Ова е стандардна процедура, иако признаваме дека не секој може да биде целосно задоволен од оваа реалност. Дејствијата на граничната полиција се во надлежност на Министерството за внатрешни работи и сите прашања во врска со нивното однесување треба да бидат насочени таму – велат од кабинетот на Гаши.

Од таму ја потвдрдија информацијата на „Слободен печат“ дека деновиве Гаши ќе свика брифинг со новинарите на кој ќе се разговара не само за патувањето на Гаши, туку и за други тековни случувања во Собранието.

 СДСМ: Тошковски го штити вистинскиот виновник

Откако министерот за внатрешни работи Панче Тошковски потврди дел од информациите на СДСМ дека пропусти имало и кажа дека законите мора да важат за сите еднакво и побара полициските службеници да одбиваат незаконски наредби, а за случајот прстот го впери во раководителот на смена на граничниот премин Блаце, СДСМ обвини дека Тошковски го штити вистинскиот виновник.

– Според нашите информации, наредбата ја издал новоназначениот началник на Центарот за гранични работи Север, Наим Рамука. Според информациите што ги добивме, еден час пред да поминат Гаши и сватовите, Наим Рамука, заради наводна контрола, дошол на граничниот премин. Во суштина, Рамука дошол за да го обезбеди поминувањето без контрола на Гаши и сватовите. Рамука е човекот што одобрил ваков излез од државата, а потоа и влез при враќање на поворката. Не човекот што го обвинува Тошковски, раководителот на смена на Блаце, туку Рамука, кој токму Тошковски го поставил за началник на Центарот за гранични работи Север – рече вчера Богданка Кузеска, портпаролка на СДСМ.

Таа праша зошто Тошковски сака да го заштити Рамука и го „мести“ раководителот на смена и побара оставка од министерот.

– Ова е голем скандал, кој не значи само тешка злоупотреба на граничниот премин, туку и своеволие, прекршување на законите и потенцијално направени кривични дела што допрва треба да се истражуваат. Безбедноста на границите ни е нарушена, а граничната контрола целосно суспендирана и ставена под партиска команда на Вреди и на ВМРО-ДПМНЕ. Ова е недозволиво и опасно за државата членка на НАТО. Време е за одговорност, онаму каде што вистински е лоцирана, почнувајќи од министерот Тошковски, па до крај. Бараме целосно да се декласифицираат и да се објават снимките од граничниот премин Блаце за време на целиот ден. Граѓаните да видат кој сè поминал без контрола, но и да се види дали и други возила се пропуштаат на граничниот премин Блаце. Тоа ќе биде основа и за истражните органи да постапуваат. Бараме Тошковски да си даде оставка. На тој начин ќе остави простор истражните органи, Јавното обвинителство, во транспарентна постапка и без притисок да ја утврдат одговорноста на сите инволвирани во овој голем скандал. ОЈО да отвори детална истрага и овој скандал да има разрешница – рече Кузеска.

Тошковски преку Фејсбук завчера информира дека за патувањето во Косово на Гаши, МВР ги прегледало камерите на граничниот премин Блаце, направило увид во евиденција на системот за контрола на патници и возила и евиденција во книгите на настани и процедури на граничниот премин. Утврдиле дека планот за патување на Гаши е уредно најавен и заведен во евидентните книги по претходно известување од Министерството за надворешни работи и дека во известувањето, покрај претседателот на Собрание, опфатени се и членовите на неговото семејство, членови на обезбедувањето и три полициски службени возила. Граничниот премин на 18 август во период од 18.40 часот до 18.42 часот го поминале шест возила под полициска придружба, од кои три полициски и едно ВИП возило и поминувањето на возилата траело многу кратко време, односно сите возила поминале само за две минути.

– Со извршените контроли во Системот за контрола на патници и возила, утврдено е дека носителот на делегацијата, како и членовите на неговото семејство што биле најавени дека ќе остварат излез, не се евидентирани во системот за контрола на патници и возила. Констатирано е дека не е целосно запазена процедурата на евидентирање на сите лица и патници што поминуваат на граничниот премин во системот за контрола на патници и возила. За утврдените пропусти во работењето од страна на Регионалниот центар за гранични работи Север кон раководителот на смена на граничниот премин ќе бидат преземени соодветни мерки за утврдување на одговорност согласно Колективниот договор на МВР – напиша Тошковски на Фејсбук.

Тој апелира сите полициски службеници да работат согласно законите и правилата и да ја одбијат секоја незаконска наредба или непринципиелно барање од кого било.

Што велат антикорупционерките
Поранешната претседателка на Антикорупциска Билјана Ивановска нема дилема дека Гаши ја злоупотребил функцијата.

– Претседателот на Собранието, Африм Гаши, со своето однесување во голема мера влијае врз креирањето на сликата во државата за однесувањето на функционерите. Како втор човек во државата тој законски ги ужива сите функционерски права, но етиката и моралот не се пропишуваат со закон, туку се вредности што го одликуваат човекот. Во отсуство на јасно поставена граница помеѓу јавната функција и приватниот интерес очигледна е злоупотребата на функцијата, бидејќи тој овозможил поминување на повеќе приватни возила без никаква гранична контрола – вели Ивановска за „Слободен печат“.

Од Антикорупциска веќе најавија дека деновиве ќе разгледуваат дали има основа за постапување за злоупотреба на службено возило.

– Во координација со надлежните органи ќе утврдиме дали има основа за постапување во овој случај. Треба да се има предвид уредбата на МВР која регулира кои лица се под постојано обезбедување, во кои спаѓа и претседателот на Собранието. Би сакала да истакнам дека движењето е поврзано со постојаното обезбедување, додека целите и потребите се во доменот на етиката и моралот на функционерите, во зависност од потребите тие да се рационализираат и да се штедат – истакна претседателката на ДКСК, Татјана Димитровска.

Вреди и ЗНАМ повторно ги вкрстија копјата

Од владиниот партнер ЗНАМ велат дека допрва ќе градат политички став дали ќе ја поддржат интерпелацијата против Гаши. Неофицијално, и опозицискиот Европски фронт нема да ја поддржи интерпелацијата.
Скандалот со свадбената поворка ги дораскара владините партнери Вреди и ЗНАМ. Лидерот на дел од Алијанса за Албанците и министер за здравство Арбен Таравари изјавата на претседателот на ЗНАМ, Максим Димитриевски, во која тој рече дека е погрешно Вреди да ги имитира ДУИ, ја нарече обид за поентирање за да се добие политичка поддршка. Претходно, од Вреди соопштија дека тезата што Димитриевски ја кажа во однос на тоа дека коалициски партнер на ЗНАМ е само ВМРО-ДПМНЕ е наивен популизам и дека гласовите што коалицијата ги добила од граѓаните на минатите избори, не можат да се обезличуваат.

– Нивото на кое комуницира Димитриевски не ми се допаѓа и не би сакал да дискутирам околу тоа. Го потсетувам дека пред три години беше избран со огромен број албански гласачи, следната година доаѓаат нови локални избори, па најверојатно повторно ќе му требаат тие гласачи – рече Таравари.

Мицкоски го фали Гаши, бил подобар од Талат Џафери

Експресното поминување на границата на Гаши и на семејството со службени возила, без контрола, не е доволна причина премиерот Христијан Мицкоски и пратениците на ВМРО-ДПМНЕ да ја поддржат интерпелацијата за работата на собранискиот спикер. Премиерот дури го пофали Гаши дека сериозно се разликува во раководењето од претходниот спикер Талат Џафери.

– Не гледаме причина за интерпелација на спикерот Африм Гаши, бидејќи начинот на кој тој се однесува како спикер на парламентот, како ги води седниците и сè тоа што таму се случува, навистина претставува сериозно различно однесување од тоа што го правеше неговиот претходник. Коалицијата СДСМ, ДУИ, Левица, претпоставувам дека имаат свои мотиви за интерпелација. Претпоставувам дека оваа коалиција, политичари од рангот на Артан Груби, Талат Џафери, Бујар Османи, Али Ахмети, им е подобра од сегашната состојба, но јас не мислам дека е така и затоа нема да поддржиме ваков тип интерпелација – изјави Мицкоски.