Италијанската полиција при рација во Милано ја уапси 19-годишната Блеона Тафалари од Косово под обвинение за тероризам, пренесува Коха.нет.

Девојката, која веќе е префрлена во затвор, била радикализирана на 16 години и била поддржувач на Исламската држава.

Таа пред неколку месеци се преселила во Милано во куќата на нејзиниот брат.

Истрагата е покрената по разузнавачки извештај за нејзиниот сопруг, 21-годишен маж од Косово, кој го познавал напаѓачот од Виена, Кујтим Фејзулај.

Нападот во Виена се случи на 4 ноември 2020 година, кога Фејзулај пукаше во неколку делови на градот и уби четири лица пред да биде убиен од безбедносните сили.

Пронајдени слики и видеа

Италијанската полиција соопшти дека во телефонот на девојчето има илјадници слики и видеа, од кои некои се направени од Медиумскиот центар за комуникации на Исламската држава Ел Хајат, на кои може да се види црно знаме со натпис за верност, сцени од тепачка, масовни убиства на „неверници“, терористички напади врз европски градови и повикот за тероризам.

Истрагата што ја спроведе антитерористичката екипа од Милано во соработка со Европол, утврди дека Тафалари регрутирала девојчиња од албанско потекло, меѓу кои и малолетници.

„Ќе ти најдам сопруг кој е како лав, со кој ќе умреш како маченик по брак натопен со крв на неверник“ и напишала осомничената на шеснаесетгодишна соговорничка на апликацијата Телеграм.

Радикализарана на 16-годишна возраст, таа била лојален поддржувач на ИСИС и учествувала во организацијата наречена „Лавови на Балканот“, огранок на Исламската држава.

Коха наведува дека младата се вика Блеона Тафалари, дека е родена во Косово и Метохија, но дека живее во Милано.