Група лекари, неколку научници, менаџери и социјални работници од Крит повеќе од десет години тргувале со новородени бебиња, олеснувале нелегалното посвојување деца, препродавале генетски материјал за вештачко оплодување, фалсификувале здравствени картони па дури и изводи од матичната книга на родени, пишува белградска Политика.

По осуммесечна истрага во Центарот за репродукција во Ханија, грчката полиција конечно успеа да ја спречи осумчлената банда која просечно заработувала и по 120.000 евра за трговија со бебиња и генетски материјал низ земјата. Гинеколог-акушер, научен соработник од областа на клиничката ембриологија, менаџер за продажба на сурогат материјали, асистент по ембриологија и акушер, како и технички лица, меѓу кои и странски државјани од Романија и Грузија, кои биле задолжени за административниот дел од работата, се приведени наведува српскиот медиум.

Како што пренесува српскиот медиум главна улога во овој криминал ја имал 73-годишен гинеколог, кој ги поучувал своите колеги и посредници како да регрутираат млади жени од Романија, Украина, Молдавија, Албанија и Грузија кои се во тешка финансиска ситуација да ги убедат за пари да си ги продадат јајце клетките или да бидат сурогат мајка.

Откако ќе биле врбувани младите жени криминалната група имала за задача да го организира нивното префрлање на Крит, каде што ќе останат затворени под будна контрола, практично во заробеништво, додека не се заврши работата. Се случувало иста жена неколку пати да биде искористена за дарување јајце-клетки, за што најчесто не и се плаќало дополнително.

Според пишувањата, следна фаза во овој процес било фалсификување документи, во кој посочено е дека донаторите се грчки државјани, со склучување фиктивни бракови за да може бебињата да бидат предадени на семејства без деца, на истополови парови кои немаат право да посвојуваат деца или мажи кои до тој момент не биле во брак.

Клиенти имале од цела Грција и од странство, бидејќи тие што доаѓале знаеле дека на лице место можат да добијат лажни изводи од матична книга на родени, здравствени картони и дека се обезбедени адвокати и нотари кои можат да ја завршат целата процедура.

Италијанските весници пред неколку години постојано пишуваа за успешната работа на центарот во Ханија и за искуствата на задоволни парови кои на тој начин го оствариле својот сон да станат родители. Но, можноста да заработат повеќе пари незаконски им дала на група вработени идеја да развијат нелегален бизнис и со помош на офшор компанија да ја прикријат својата дополнителна трговија, која, како што пишуваат локалните весници, се повеќе добива форма на бебешка индустрија.

Во текот на истрагата било утврдено дека за само осум месеци во 15 изнајмени и добро опремени куќи каде што престојувале под надзор, 200 жени станале сурогат мајки, од кои 78 биле донаторки на јајце клетки… Регистрирани се и 13 случаи на нелегална трговија со бебиња, преку измама на жени кои дошле на клиника за породување. Многу детали се уште не се откриени, а се сомнева дека уште многу бебиња биле земени од нивните мајки и продадени. Криминалната група се соочува со строга казна за повеќе кривични дела.