Грција кон крајот на септември ќе почне да ја прима последната серија од шест борбени авиони Рафал од Франција, пренесува „Катимерини“. 

Грчките воздухопловни сили ќе добиваат по еден авион произведен од Дасо месечно, а испораката се очекува да биде завршена до јануари 2025 година.

Новоизградените Рафали беа нарачани од Франција во март 2022 година. Откако ќе бидат испорачани новите авиони, Грција ќе има вкупно 24 Рафали во својата флота, сите со седиште во воздухопловната база Танагра во близина на Атина.

Грчките власти, исто така, ја истражуваат можноста да нарачаат дополнителни 12 Рафали за да формираат две тактички крила од по 18 авиони.

Рафал ќе биде најнапредниот авион во арсеналот на Грција додека не пристигнат 20 F-35 од американско производство.

САД се очекува наскоро да го одобри грчкото писмо за прифаќање (LOA), поднесено во јули, со кое се овластува Локхид Мартин да започне со производство, а првите испораки на Ф-35 се закажани за 2028 година.