Министерството за социјална политика, демографија и млади редовно ги обработува и постапува по пристигнатите барања од детските градинки и установи за социјална заштита и ги проследува на одобрување во Министерството за финансии, кое треба да даде согласност и да обезбеди средства за нови вработувања на воспитувачки, негувателки и друг персонал.

Ова го тврдат од Министерството за социјална политика, демографија и млади, откако Општина Карпош јавно посочи дека во градинките во Карпош во моментов недостигаат 43 негувателки и воспитувачки. Толку во изминативе две години заминале во пензија, а на нивно место не се примени нови. Но, за да се исполни законскиот стандард, според нив, потребни се уште 60-ина, со кои би се обезбедило нормално функционирање и згрижување на децата. Притоа, од Општината обвинија дека Министерството ниту дава согласност да се примат на работа нови на местото на оние што заминале во пензија, ниту издава лиценци неопходни за нови вработувања.

На прашањето до Министерството зошто подолго време не се дава согласност за вработување негувателки и воспитувачки во градинките во Карпош, на место на оние што заминале во пензија, оттаму посочуваат колку точно барања пристигнале до нив последната година од градинките во оваа општина и до каде е постапувањето со нив.

Детската градинка „Пролет“ нема доставени барања за вработување до министерството; детската градинка „Мајски цвет“ има доставено барање за вработување на два воспитувачи, еден негувател и еден помошник готвач и барањето е проследено во МФ на 07.10.2024 година, но не е добиен одговор; детската градинка „Распеана младост“ има доставено барање за вработување за три негуватели, еден стоматолог и еден хигиеничар и по однос на нив е постапено од Секторот за управување со човечки ресурси во Министерство за социјална политика, демографија и млади, односно поднесено е барање до МФ на 1.11.2024 година, но не е добиен одговор; детската градинка „Орце Николов“ има доставени барања за вработување седум негуватели, еден воспитувач, еден хигиеничар и еден материјален книговодител и тие се проследени до МФ заедно со пополнета табела за предизвикани фискални импликации. Од МФ е добиена согласност за вработување пет негуватели во декември 2024 година и треба да биде продолжена за реализација во 2025 година – прецизираат од Министерството.

Оттаму објаснуваат дека во согласност со Законот за извршување на буџетот на РСМ за 2025 година, буџетските корисници доставуваат барање за добивање известување од Министерството за финансии за обезбедени финансиски средства за пополнување работно место преку вработување на неопределено време во градинките по претходно извршена анализа за оправданоста на барањето за вработување и само доколку станува збор за работно место што е неопходно за вршење на основната дејност на единката корисник.

На градинките во Карпош итно им треба персонал: За 25 деца во јасли се грижи една негувателка

Во врска со тоа кога последен пат е спроведено полагање за лиценци, кои се неопходни за вработување во градинка и кога се планира повторно да се спроведе, од Министерството велат дека полагање немало од октомври 2023 година, но не посочија кога ќе има повторно.

 Со измените на Законот за детска заштита, повторно се овозможува полагање за лиценци. Законот ја помина собраниската процедура, а со неговото објавување во „Службен весник“ ќе влезе во сила и во најбрз можен рок ќе се започне со полагање. Измената на законското решение овозможува во исклучителни ситуации да се предвиди начин на кој ќе продолжи континуирано да тече процесот на полагање испити за стекнување лиценца за работа, односно со полагање на испитот во хартиена форма – велат од Министерството за социјална политика, демографија и млади.

Откако Карпош информираше за состојбата со кадарот во градинките, се обидовме да дознаеме што се случува во другите скопски општини. Одговор стигна само од Центар и Кисела Вода, додека другите не чувствуваа потреба да објаснат каква е состојбата со воспитувачки и негувателки во претшколските установи на нивна територија, каде што младите родители ги оставаат децата со надеж дека ќе имаат добра грижа и нега.

Во центарската градинка „13 Ноември“ целосно се покриени потребите со негуватели и воспитувачи, а во градинката „Кочо Рацин“ има доволно негуватели во јасли, но годинава оттаму заминуваат во пензија две воспитувачки, на чии работни места, како што посочуваат од Општина Центар е потребно во најбрз можен рок, според законските процедури да се реализираат нови вработувања, врз основа на трајно испразнети места.

Во градинката „Раде Јовчевски-Корчагин“ во 2023-2024 година се заминати три негувателки во пензија и не се добиени согласности за пополнување трајно испразнети места. Во процедура сме за добивање согласности. За оваа година 2025 дополнително се планирани неколку пензионирања и итноста од вработување е повеќе од потребна, односно на секое заминување во пензија да се добие согласност за пополнување трајно испразнето место (ново вработување) – велат од Центар.

За да се надомести потребата од неопходниот кадар во градинките, Општина Кисела Вода од својот буџет троши средства за привремени вработувања.

На основ на пензионирање во двете установи има вкупно 9 пензионирања, а добиени само 4 согласности за вработување за кои веднаш се објавува оглас и местата се пополнуваат. Во овие три години Општина Кисела Вода обезбедува 35.000.000 денари за привременo вработени и со тоа го покриваме недостатокот од кадар што во градинките. Но, со самото тоа што ги зголемуваме капацитетите на градинките и градиме нови објекти, што е наша стратегија, потребен е дополнителен кадар и редовно доставуваме барање за нови согласности од ресорното министерство – објаснуваат од Кисела Вода.

Оттаму додаваат дека во јаслените групи во нивните градинки има доволен број негуватели.