Иако Швајцарија, Соединетите Американски Држави и Обединетите Арапски Емирати сè уште успеваат да привлечат дел од богатите, Црна Гора е најбрзо растечкиот центар во светот за имиграција на милионери. Според податоците од швајцарската компанија Henley & Partners, во текот на минатата година бројот на милионери кои се преселиле во Црна Гора се зголемил за дури 124 проценти, објавува бизнис весникот Fortune- пренесе Нова.рс.

Моментално, во Црна Гора живеат околу 2.800 милионери, што е помалку отколку во некои други земји. Сепак, Црна Гора ги привлекува благодарение на програмата „инвестиција за државјанство“, позната и како „златен пасош“. Покрај тоа, како што истакнува Доминик Волек од Хенли и партнерс, Црна Гора станува привлечна поради близината до Западна Европа и даночната флексибилност.

„Ниските даноци во Црна Гора, со фиксен данок на доход и без данок на наследство или подарок, ја прават особено привлечна за складирање богатство. Во комбинација со јадранскиот брег, понудата на луксузни недвижности и атрактивниот медитерански начин на живот, оваа земја станува избор на бројни инвеститори“, рече Волек.

Освен во Црна Гора, зголемување на бројот на богати луѓе кои емигрирале е забележано и во Малта, Полска, Кина, Костарика, Индија и Латвија. Од друга страна, најмногу милионери се преселиле од Велика Британија, Кина, Индија, Јужна Кореја, Русија, Бразил, Франција, Шпанија и Германија.