Асоцијацијата за култура ИКОН, во соработка со Македонската академија на науките и уметностите, го најави отворањето на изложбата „Три приказни“, посветена на 90 години од раѓањето на австрискиот уметник Бернхард Холеман (1935–2020), голем пријател на Македонија и автор со длабока визуелна и духовна поетика.

Отворањето на изложбата ќе се одржи на 12 јуни 2025 (четврток), во 19:30 часот, во изложбениот салон на Македонската академија на науките и уметностите (МАНУ) во Скопје.

На изложбата ќе бидат претставени дела создадени во Македонија, распоредени во три тематски циклуси: „Богомолки“ – посветен на симболиката на инсектот богомолка; „Во слава на виното“ – омаж на виното како културен и духовен симбол; и „Свети Наум како ликовен сон“ – инспириран од манастирскиот простор на Охрид.

Оваа изложба претставува ретка можност публиката да се запознае со уметност која ги поврзува природното, човековото и трансценденталното. Делата на Холеман се сведоштво за креативниот дијалог меѓу Австрија и Македонија и придонес кон европската културна сцена. Изложбата ќе биде достапна за јавноста во текот на јуни 2025 година, соопштија од Асоцијацијата за култура ИКОН.