За време на бојкотот на пет големи трговски ланци во Србија, во петокот на 31.01.2025 година издадени се вкупно 865.758 фискални сметки, соопшти Даночната управа на Србија. Ова е за 21,5 отсто помалку сметки отколку што беа издадени во овие продавници две недели порано, во петокот на 17 јануари.

Даночната управа на Србија не ги објави податоците за петокот меѓу овие два датума, а потоа, да потсетиме, студентите ги повикаа граѓаните на генерален штрајк и општ бојкот на набавките на сите продажни места. Даночната управа на Србија објави дека „поради големиот јавен и медиумски интерес за бројот на фискални сметки издадени од даночните обврзници „Делез“ (Макси и Шоп&Го), „Меркатор“ (Рода и Идеа), „ДИС“, „Универекспорт“ и „Лидл“, ги открива следните податоци: Во петок, 31.01.2025 година, бројот на издадени фискални сметки е 865.758. Во четврток, 30.01.2025 година, бројот на издадени фискални сметки е 1.157.985.

Во петок, 17.01.2025 година, бројот на издадени фискални сметки е 1.103.159. Во четврток, 16.01.2025 година, бројот на издадени фискални сметки е 1.095.561. Од Даночната управа напоменуваат дека објавените податоци се кумулативни, „земајќи ги предвид одредбите од чл. 7 од Законот за даночна постапка и даночна администрација“. Сепак, податоците за вредноста на вкупниот промет во овие пет трговски синџири – не се објавени. Интересно е што самата даночна управа на Србија објавува податоци од денот на бојкотот и претходниот ден, како и податоци од петок и четврток од пред две недели, а не од пред една недела. Дали падот на прометот и бројот на фискалните сметки бил забележлив и во петокот на 24 јануари кога во Србија се одржа генерален штрајк на студентите – засега не е познато, пишува Н1 Инфо.