Милиони луѓе го користат Четџипити (ChatGPT) секој ден за совети, мисли, па дури и признанија. Но, малкумина знаат дека само еден погрешен чекор може да доведе до сериозно нарушување на приватноста.

Дали некогаш сте му кажале тајна на Четџипити? Па, можеби тоа не е најдобрата или најбезбедната идеја.

Сè што ќе му кажете на Четџипити може да се искористи против вас на суд како доказ во случај на тужба, според извршниот директор на „Оупен АИ“ (OpenAI), Сем Алтман, кој го издаде предупредувањето во изјава на поткаст.

„Ако разговарате со Четџипити за вашите најчувствителни работи, а потоа има тужба, можеби ќе бидеме обврзани да ги доставиме тие разговори“, предупреди тој, вклучувајќи ги и записите од избришаните разговори, кои Оупен АИ е законски обврзан да ги чува, пренесува „ТРТ Глобал“ (Тrt.global).

„Во моментов, ако разговарате со терапевт или адвокат или лекар за тие проблеми, постои законска привилегија за тоа. Постои доверливост помеѓу лекарот и пациентот, постои законска доверливост. И тоа сè уште не сме го регулирале за разговорите со Четџипити“, изјави тој.

Алтман ја повика потребата од нови закони за заштита на приватноста на историјата на разговорите и регулирање на употребата на вештачката интелигенција.

Сè повеќе корисници на вештачка интелигенција откриваат дека разговорите што ги споделуваат преку опцијата „Сподели“ во интерфејсот Четџипити всушност можат да станат јавно достапни за целиот интернет. Секоја врска што е споделена без дополнителни поставки автоматски се индексира од Гугл, што значи дека може да се најде со едноставно пребарување.

На пример, само напишете „site:chat.openai.com/share trauma“ за да пристапите до стотици разговори за проблеми со менталното здравје, зависности, семејни конфликти и други исклучително лични теми, предупредува „Тек кранч“ (Тechcrunch.com).

Како функционира споделувањето во апликацијата Четџипити?
Функцијата „Сподели“ им овозможува на корисниците да споделат дел од разговорот преку автоматски генерирана врска. Иако името на корисникот не е видливо во тој приказ, врската е јавна освен ако корисникот рачно не ја постави на приватна.

Ако некогаш сте споделиле ваков линк, проверете дали сте во опасност:

– Отворете го линкот што го споделивте

– Погледнете го горниот десен агол

– Ако пишува „Јавно“ – вашата содржина е индексирана и видлива

Кликнете на „Направи приватно“ за да спречите понатамошно ширење.

Експертите препорачуваат, доколку веќе споделувате содржина, да го правите тоа преку снимка од екранот, а не преку јавен линк. Така ќе бидете сигурни дека вашите податоци остануваат надвор од прелистувачот.

Повеќето корисници не знаат дека овие линкови се јавно достапни бидејќи Четџипити, не става до знаење јасно, дека споделената содржина автоматски се индексира. Дополнително, иако линкот изгледа безопасен, содржината често содржи длабоко лични информации – од емоции и трауми до информации за семејството, љубовните врски, па дури и деловните ситуации.

Во време кога дигиталната приватност е една од клучните теми, важно е да се знае дека разговорите со вештачката интелигенција не се нужно доверливи.

Значи, пред да кликнете на „Сподели“, размислете повторно. Во дигиталниот свет, секој клик остава трага, а некои траги водат многу подалеку отколку што сте планирале.