ВМРО-ДПМНЕ и ДУИ нема да учествуваат на денешната јавна дебата за една изборна единица и отворени листи што ја организира претседателот на Комисијaта за политички систем Александар Кирацовски, велат собраниски извори. Кирацовски за „Слободен печат“ изјави дека покани за учество на дебатата испратил до сите пратенички групи но, од двете партии нема добиено повратен одговор. На дебата учествуваат бројни експерти меѓу нив и професорот Светозар Шкариќ, Александар Кржаловски од МЦМС, Џабир Дерала од Цивил, претставници од помалите политички партии.

– Очекувам плодна дебата и највиско и изнeсување на сериозни аргумeнти, кои идејата за една изборна единица ќе ја подигнат на високо ниво пред политичките фактори. Дебатата е со цел да ги направи свесни дека независно колку би добиле или би изгублиле со овој изборен модел на крај сепак добива демократијата и граѓаните, затоа што овој изборен модел најсоодветно ја пресликува изборната воља на граѓаните – рече Кирацовски.

За недоразбирањето со собранискиот спикер Талат Џафери околу тоа дали Деловникот дозволува јавна расправа за Измените на изборниот законик во правец на изборниот модел, Кирацовски вели дека како претседател на Комисија имал свои ингеренции.

– Имам своја номинална сила согласно функцијата претседател на собраниска комисија и нема потреба за дискусија дали треба да има или да нема јавна дебата. Според Деловникот имам право на јавна дебата. Претседателот на собранието Џафери спореше за јавна расправа – вели Кирацовски.

Денеска пратеничката на ДОМ Лиле Поповска која ја предводи групата пратеници кои поднесоа предлог за измени во Изборниот законик, рече дека не гледа причина зошто пратениците на ВМРО-ДПМНЕ и ДУИ не би дошле на јавната дебата за една изборна единица и отворени листи. Не очекува опструкции бидејќи Измените на изборнот модел веќе се блокирани со непринципиена блокада со над 10 илјади амандмани.