Министерот за економија Крешник Бектеши соопшти дека владата во склип на мерките за поддршка на туризмот донела уште една мерка која се однесува на хотелиерита, а со неа се предвидува кофинансирање настани кои би се одржувале кај нив, како семинари, обуки и конвенции.

За таа намена од Ковид – 19 програмата ќе се одвојат 15 милиони денари, а според мерката сите што ќе организираат вакви настани ќе доплатат само 50 отсто од вкупната цена за трошоците.

Како што соопшти министерот со оваа мерка предвидено е да се покријат околу 500 настани, а еден апликант може да поднесе до максимум 3 барања. По реализација на настанот, ќе треба да достави фактура заедно со извештај и докази дека настанот се одржал.

За спроведување на оваа мерка ќе биде објавен јавен повик.

– Целта на мерката е да им помогнеме на хотелиерите во овие услови на корона криза, напомена министерот.

Тој потсети и дека е во завршна фаза подготвувањето на платформата „Дома си е дома” преку која ќе се реализира мерката за ваучери за летување на граѓаните кои имаат под 15.000 денари месечна плата. Платформата ќе биде оперативна до крајот на неделата. Преку неа ќе бидат испратени ваучерите до граѓаните, на меил, заедно со код. На плаформата ќе бидат објавени и понудите на сите категоризирани сместувачки капацитети во државата.

– Ваучерите ќе може да се користат од 15 јули до 15 декември. Не ги делиме по етничка основа. Листата во УЈП се формира според тоа дали граѓанинот апликант ги исполнил потребните услови. Ја добиваме листата не по етиничка основа, туку според исполнетите критериуми, потенцира Бектеши, одговорајќи на новинарско прашање.