Голем ден не очекува денеска во Управниот комитет, а подоцна и во Владата каде ќе го разгледаме извештајот на нашиот консултант околу преговорите со конзорциумот Бехтел-Енка за изградба на Коридорот 8 и 10 Д, како и предлог-договорот за усвојување и потпишување, пишува вицепремиерот и министер за политички систем и односи меѓу заедниците Артан Груби на неговиот официјален Фејсбук-профил.

Бојан Стојаноски пратеник од редовите на ВМРО-ДПМНЕ вчера побара од Јавното обвинителство итно да отвори постапка за случајот околу тендерите за изградба на Коридорите 8 и 10д. Тој денеска обвини и дека тендерот од 22 милиони евра е местен од страна на власта за Конзорциумот во чиј состав е ЕПТИСА, која е претходно прогласена од истата влада дека работела незаконски, неетички и несоодветно.

Најновите документи кои дојдоа до нас говорат дека Електра Солушнс, на 30 годишниот Андон Ампов, која е составен дел од Конзорциумот која го добива тендерот од 22 милиони евра, добива лиценца за надзор во тек на постапката за избор на надзор на изградбата на Коридорите 8 и 10д. Ова е Лиценцата која Министерството за транспорт и врски и ја издава на Електра Солушн на ден 03.10.2022 година, што е 3 недели откако е распишан јавниот повик за избор на надзор на изградбата на Коридорите 8 и 10д, изјави пратеникот Стојаноски.

Според него, има две ситуации што индицираат на нерегуларности при изборот на шпанската фирма ЕПТИСА, а како што вели, само тие се доволни за ЈО да отвори постапка.

Прво, Владата на 30.09.2020 година носи Одлука со која им препорачува на сите институции да не склучуваат договори со ЕПТИСА, затоа што истата работела несоодветно, незаконски и неетички, на железничката пруга Куманово – Бељаковце, една година подоцна Министерството за транспорт и врски носи Потврда со која и издава дозвола ЕПТИСА да може да врши надзор за истите работи за кои веќе еднаш на владина седница е констатирано дека истата работела незаконски, неетички и несоодветно. Второ, власта во тек на јавниот повик за избор на надзор, го менува огласот во два дела, првин го продолжува рокот за поднесување пријави, но и го брише условот само фирми со позитивни биланси од последните 3 години да можат да учествуваат на истиот. Со оваа одлука власта дозволува фирми загубари да се јават и добијат тендер вреден 22 милиони евра. Таква фирма загубар е и ЕПТИСА, која во билансите од 2019, 2020 и 2021 година прикажува милионско загуби, изјави пратеникот.

Во истражувачката сторија што ја објави „Призма“, тие пишуваат дека во шпанската фирма во Ерменија работел Бранислав Димитријевиќ, македонски државјанин под истрага на ерменското обвинителство.

Димитријевиќ бил на позиција тим лидер за француско-шпанскиот конзорциум „Савеж-Ептиса“. Информацијата ја потврди и ерменското обвинителство.
„Ептиса“ вчера ги демантираше Призма. Во демантот се наведува дека Димитријевиќ не бил ангажиран или вработен во Ептиса, туку имал минорна улога во спроведување на проектот.

„Ве информираме дека Ептиса на проектот во Ерменија беше членка на Конзорциумот (воден од друга меѓународна компанија). Ептиса имаше минорна улога во спроведувањето на проектот и г-дин Димитријевиќ не беше ангажиран или вработен во Ептиса. Исто така, ве известуваме дека г. Димитријевиќ никогаш не бил ангажиран или вработен во Ептиса на ниту една позиција“, се наведува во демантот на Ептиса.

Премиерот Димитар Ковачевски минатата недела порача да се пријави секаков сомнеж или информации во однос на интегритетот на вработени, подизведувачи, субконтрактори.. вклучени во инфраструктурниот проект.

На 2 февруари во Владата беше потпишан договор со италијанската ИРД инжинеринг за надзор и правен трансакциски советник за четирите автопатски делници во должина од над 120 километри на коридорите 8 и 10д.

Со потпишувањето на договорот стартуваа преговорите на надзорот во име на Управувачкиот комитет на Владата со „Бехтел и Енка“ за натамошниот тек на проектот, што според најавите треба да стартува годнава. Следна фаза треба да биде потпишување договор за изведба на работи на автопатските делници на Коридорот 8: Требеништа – Струга – Ќафасан (22,5 километри) Гостивар – Букојчани (30,1 километар), Тетово – Гостивар ( 27 километри) и на делницата Прилеп – Битола (43,4 километри) од Коридорот 10- д.