Владата отвора Ресурсен центар за поддршка на општините, со цел зајакнување на нивните капацитети и подобрување на локалните услуги. Министерот за локална самоуправа, Златко Перински, истакна дека центарот ќе нуди стручна и долгорочна поддршка за решавање на проблемите со кои се соочуваат општините – недостиг на административен кадар, ограничени економски можности и недоволно развиена инфраструктура.

Центарот ќе функционира преку дигитална платформа, каде општините ќе можат да побараат експертска помош. Експертите ќе се ангажираат по проект, а не како редовно вработени.

Во следниот период ќе се работи на создавање на ростер на експерти, прирачник за идните градоначалници, насоки за надминување на слабостите воочени од Државниот завод за ревизија и поттикнување на меѓуопштинска соработка.

„Со оваа иницијатива градиме поефикасни и посилни општини и обезбедуваме подобри услуги за граѓаните“, порача Перински.