„Со задоволство информирам дека на денешната седница на Владата беше усвоена Стратегијата за зајакнување на капацитетите за финансиски истраги и конфискација на имот за периодот 2025–2028, заедно со Акцискиот план“, изјави денеска вицепремиерот за добро владеење, Арбен Фетаи.

„Овој документ ја одразува непоколебливата посветеност на Владата на Република Северна Македонија за борба против организираниот криминал и корупцијата, преку зајакнување на надлежните институции со структуриран и систематски пристап, кој има за цел зголемување на ефикасноста при конфискацијата на незаконски стекнат имот“, рече тој.

Една стратегија, вели Фетаи, колку и да е добра, останува само документ доколку не се спроведува ефикасно.

„Поради тоа ги зајакнуваме механизмите за следење и надзор, преку основање на Националниот совет за финансиски истраги и конфискација на имот, кој ќе обезбеди успешно спроведување на утврдените цели“, рече тој.

Кабинетот на Фетаи, според Владата, ќе има централна улога во координирањето и поддршката на овие напори, обезбедувајќи постојана посветеност за реализација на новата стратегија.