Уште десет случаи на кардиолошки операции за кои пациентите се сомневаат дека им биле извршени без медицинска потреба, се пријавени во Фондот за здравствено осигурување, а пријавители се граѓани и организации. Претходно, до надлежните стигнаа и пет предмети кои сега ги разгледува посебна комисија.

Според извори на „Телма“ приватна болница ќе достави и нови десетина случаи на сомнителни операции кои биле извршени во државни болници.

Министерството за здравство пред две недели побара од Лекарската комора да изврши надзор во 11 јавни и приватни здравствени установи во кои се извршувале кардиолошки, кардиохируршки и кардиоваскуларни интервенции, по наводите на кардиохирургот Сашко Кедев дека во приватни болници во земјава се вршеле непотребни зафати на срце заради профит.

Надзорот, како што појаснуваат од Комората, треба да опфати период од три години, и да се изведе по принцип на случаен избор на медицински истории. Но, поради обемноста, велат побарале од здравство изборот да се направи преку електронскиот систем „Мој термин“, како најбрз начин за селекција, со цел побрзо да почне надзорот.

По обвинувањата дека приватни болници непотребно оперирале само за профит, министерот за здравство формираше две комисии, домашна и странска, кои треба да ги разгледаат сомнежите.

Експерти од Словенија, Италија и Австрија ќе треба да кажат дали сомнежите се оправдани и дали навистина имало непотребни операции на срце за да се извлечат фондовски пари. Најавено е дека странската комисија ќе почне со работа по изборите.