Глобално популарниот виртуелен сезнајко Четџипити ќе биде надграден со глас и со очи, поради што од дописник ќе стане соговорник на корисниците, слично како уредот и апликацијата Сири, најавуваат креаторите.

– Гласовната способност отвора врати до многу креативни апликации фокусирани на пристапноста – објави компанијата „Опен АИ“.

Само неколку денови по промоцијата при крајот на минатата година, Четџипити стана светска сензација, зголемувајќи ја креативната моќ на лица или на компании за создавање пишани и други содржини. Дигиталната алатка со вештачка интелигенција сега масовно се користи за составување есеи и други пишани творби, средување документи, но и за пишување компјутерски кодови.

Тоа поттикна трка меѓу информатичките гиганти да развијат што посовршени алатки, кои имаат пристап до што повеќе споделени материјали, но и да не „халуцинираат“ – да цитираат непостоечки документи. „Мајкрософт“ вложи десетици милијарди долари за понатамошен развој на Четџипити.

„Гугл“ го развива проектот Џемини, кој наводно веќе се тестира во избрани компании. „Амазон“ завчера објави дека ќе вложи до 4 милијарди долари во новата компанија „Антропик“ за да го поддржи и надгради својот систем за трговија преку интернет, но и да се вклучи на пазарот на новата технологија.

Засилена конкуренција го притиска „Опен АИ“ да ја надгради својата алатка. Гласовните новитети во Четџипити опфаќаат создавање приказни за добра ноќ и медијација при семејни дебати или расправии.

Визуелната поддршка, пак, ќе им овозможи на корисниците да фотографираат или да снимаат предмети и да бараат одговори од својот соговорник за содржината и намената, како и за надминување проблеми, на пример како да се отстрани едноставен дефект или што може да се зготви од храната во фрижидерот. Четџипити ќе има и капацитет да анализира комплексни графици за изнаоѓање оптимални решенија во бизнисот.

„Опен АИ“ објави дека новите можности на Четџипити ќе бидат достапни за претплатниците на плановите Плус и Ентерпрајз до средината на октомври.