Виетнамскиот парламент треба во среда да одобри дополнителен данок за мултинационалните компании, што ќе ја зголеми ефективната стапка на корпоративната давачка на 15% од јануари во согласност со глобалниот договор.

Виетнам првично планираше да го комбинира одобрувањето на данокот со мерки за делумна компензација на големите странски инвеститори погодени од повисоките давачки, вклучително и јужнокорејскиот електронски гигант Самсунг и американскиот производител на чипови Интел, но посебната резолуција не е на дневен ред на парламентот.

Во знак на тоа колку е контроверзен новиот данок, бидејќи може да ја намали привлечноста на Виетнам меѓу странските компании, доколку не се усогласи со придружните субвенции, парламентот првично ја отфрли можноста за гласање на својата тековна седница, последната оваа година, пренесува Ројтерс.

Нејасно е дали на оваа седница би можело да се усвојат дополнителни стимулации за некои странски инвеститори со посебна законска регулатива, без да се донесе конкретна резолуција за тоа. Парламентот во секој случај би можел да ја усвои резолуцијата за стимулации на подоцнежна седница.

Според новите правила што ги проверува Организацијата за економска соработка и развој (ОЕЦД), компаниите кои плаќаат помалку од 15% во јурисдикција со ниски даноци ќе се соочат со доплата или во таа јурисдикција или во нивната матична земја од следната година.

Корпоративниот данок на доход во Виетнам веќе е поставен на 20%, но земјата со години нуди ефективни стапки дури 5% и долги периоди со нула даноци на големите странски инвеститори.