Прославениот српски фудбалер Немања Видиќ, кој на почетокот на годинава поднесе кандидатура за претседател на Фудбалската федерација на Србија и набрзо се откажа од кандидатурата, јавно праша дали и тој треба прво да оди во затвор за да може да извршува некоја функција во српскиот фудбал.

– А како тоа Драган Џајиќ, кој беше во затвор и призна дека се занимавал со проневера, и Ѕвездан Терзиќ, кој не ја докажал својата невиност, но постапката против него е застарена, ги водат двете најголеми организации во српскиот фудбал. Федерацијата и Звезда. Тоа е прашање што сите треба да го поставиме – изјави Видиќ во интервјуто за „НИН“.

Тој изјави дека тоа е „порака за сите луѓе во Србија да не гледаат на работата, дека не е важно дали сте работеле добро или лошо, важно е дали сте подобни“.

Како што рече, „Џајиќ четири години не успеал да ја докаже својата невиност, а потоа пред 11 години тогашниот претседател на Србија, Томислав Николиќ, го помилувал“, што Џајиќ го прифатил и „притоа признал дека ја украл Звезда, односно дека учествувал во проневера“.

Видиќ рече дека Терзиќ „се гордее со тоа што бил во затвор, вели дека таму запознал многу квалитетни луѓе“.

– Немам проблем Терзиќ да ги воспитува своите деца на тој начин. Но, тој ги испраќа тие пораки до моите деца, до нашите деца. Дека е во ред да се оди во затвор, дека тоа е начин да се зајакне и да постигне успех – рече Видиќ.

Видиќ во својата кариера најголемите успеси ги имаше со Манчестер јунајтед, петпати освојувајќи ја Премиер лигата, а еднаш ја освои Лигата на шампионите во сезоната 2007/2008.