Владиниот предлог преку видеонадзор и боди-камери да се контролира работата на службениците во ситуации кога се во контакт со граѓаните е незаконски и нема врска со дигитализација на администрацијата – изјави претседателот на Конфедерацијата на слободни синдикати (КСС), Благоја Ралповски, за „Слободен печат“.

Владата на 86. седница ги разгледуваше предлозите преку видеонадзор и боди-камери да се регулира контролира на службениците. Според вицепремиерот за борба против корупцијата Лупчо Николовски, целта на овој проект е превенирање од коруптивни дејства и јакнење на транспарентноста при вршење на работните задачи и обврски во институциите.

– Овој предлог не се однесува на целата администрација, туку на оние сектори каде што процесот на работа не може комплетно да се дигитализира и неопходно е физичко присуство на службеникот. Секако, овој предлог детално ќе се истражи и анализира од аспект на негова имплементација, опфатот на службениците, обезбедување на сигурноста и приватноста на граѓаните, како и техничките и законските можности – објаснува Николовски за „Слободен печат“. Според него, до крајот на август сите измени и дополнувања на потребните закони за дигитализација ќе бидат подготвени и доставени до Собранието.

Првиот човек на КСС е крајно скептичен кон оваа новина и најавува синдикален одговор.

– Ова ниту ќе се изведе ниту ќе се направи, бидејќи е забрането да се снимаат вработените додека работат. Не знам кому ова му текнало, но тоа нема врска со реформа и со дигитализација на јавната администрација, ова е буквално малтретирање на вработените во јавниот сектор! Видеонадзорот не е за снимање на вработените туку е за обезбедување објекти и имоти – вели Ралповски.

Според него, за боди-надзорот (вработениот да носи камера на кошулата) треба да се прашаат и граѓаните дали се согласни да бидат снимани додека се на шалтер или во контакт со владини службеници.

– Наместо да се свртиме кон вистинска дигитализација, која ќе придонесе да бидат задоволни и службениците и граѓаните, да не доаѓаат по шалтерите на институциите за секој документ, ние правиме нешто што го нема никаде во Европа – да се снимаат вработените додека работат! Ние ќе пружиме голем отпор на оваа идеја и нема да дозволиме да се реализира. Мислам дека и граѓаните ќе нè поддржат во тоа – нагласи Ралповски.