Олег Забазновски е еден од тие кои решиле да студираат надвор од државата. Образованието го завршил во Бугарија каде што студирал гастрономија. После студиите работел во ресторани кои имаат Мишелин ѕвезди во Шпанија. Но судбината и понудата за работа го вратиле во Скопје.

Сега Забазновски, познат како Ољо, е 26-годишен искусен готвач и основач на „Ољос“, ресторан и бренд за бургери.

За „Слободен печат“ вели дека работата во Шпанија била предизвик за едно 19-годишно момче. Неговото искуство во ресторани како „Неруа Гугенхајм“ во Билбао и „Енотека Пако Перез“ во Барселона, му помага да развие големо работно искуство.

Неговата пасија кон готвењето се разбудила кога имал осум години. А како инспирација за неговите почетоци била неговата мајка, со која започнал да ги готви првите рецепти.

-Причина поради која сакав да излезам надвор од Македонија и да студирам кулинарство и гастрономија е затоа што реално нашата држава не нуди многу добро образование за готвачи – објаснува Забазновски.

Олег вели дека целата идеја по неговото враќање од студиите е да создаде најдобар бургер во Скопје, кој ќе биде претставен во еден од најпознатите локали во Скопје.

Тој и неговите пријатели креирале перфектно бургер мени, а „Ољос“ полека се проширувале на „поп-ап“ настани.

-Луѓето почнаа да нè следат, да ни пишуваат кога ќе бидеме на следниот настан. Брзо се распродаваа – додава тој за „Слободен печат“.

После неколку кулинарски проекти во Скопје, почетокот на својот проект го креирал и работел со мал тим и неговата девојка. Тој објаснува дека првите месеци биле тешки, но со напорна работа и љубов го постигнале финалниот продукт.

-„Ољос“ го отворивме јас и мојата девојка, и на почетокот бевме со еден вработен, со тоа што првите шест до осум месеци, работевме цел ден, од сабајле до вечер – раскажува тој.

Сега, „Ољос“ има свој ресторан, камион за храна (food truck) и две мобилни кујни за кетеринг.