Нутриционизмот е наука која се занимава со истражување на ефектите на храната и нејзиниот состав врз човечкото здравје. Во денешно време, кога бројни здравствени проблеми се поврзани со неправилната исхрана, значењето на здравата и балансирана исхрана станува клучно за превенција и лекување на болести, како и за поддршка на општата благосостојба. Во утринската емисија „Слободен печат“ зборувавме со Татјана Павлова, нутриционист, која им помага на луѓето да постигнат да го одржат здравјето и виталноста.

Павлова уште од нејзина најрана возраст знаела дека ќе се занимава со природни науки, здрава храна и здрав начин на живот. Завршила Факултет за земјоделски науки и храна како и постдипломски по нутриционизам. Како нутриционист работи веќе 8 години.

За „Слободен печат“ вели дека Македонците немаат правилен начин на исхрана. Таа објаснува дека секој човек треба да направи анализа како се храни, каде греши во исхраната и како може да ја подобри.

– Моето искуство и работата како нутриционист ми укажа на тоа дека навистина имаме буквално големи грешки во начините на исхрана. Готвењето е нешто што е вкоренето во нашите гени, но за жал ние сè почесто се тргаме од оние основни навики – вели Павлова“

Таа додава дека проблемите со исхраната сè почесто се појавуваат кај помладата популација.

– Свеста за посета на нутриционист не е на највисоко ниво, многу често нè поврзуваат само со намалување килограми – вели Павлова. 

Нејзината работа е водена од желбата да помогне секому да постигне здравје и виталност на долг рок, преку свесен избор на храна која ја поддржува целокупната физичка и ментална благосостојба. Но, за жал стресните времиња во кои живееме носат болести како канцер, обезност, дијабетес, заболувања на тироидната жлезда итн.

– Не само во Македонија, значи, општо земено и во останатите балкански земји, појавата на Хашимото тироидитис, хипотироидија, намалена функција на тироидната жлезда, е многу честа појава. Би можела да кажам дека тоа е дури и пандемија – вели Павлова.