Едно од предизборните ветувања на актуелниот британски премиер Риши Сунак е дека ќе го врати задолжителниот воен рок доколку на изборите победи Конзервативната партија. Младите ќе можат да изберат дали ќе поминат еден викенд месечно како волонтери во текот на годината или ќе заземат една од 30.000 слободни позиции во вооружените сили една година, рече Сунак. Идејата е младите преку војската да се социјализираат, затоа што практично и да немаат каде, често се дома и на телефоните и компјутерите, вели за „Слободен печат“, Жанета Скерлев дописничка од Лондон.

Скерлев додава дека порано во Англија имало многу клубови за млади од кои веќе нема траг.

– Сунак тоа го обвитка на некој начин во патриотизам или љубов кон сопствената држава, дека младите треба да се запознаат меѓу себе, да се социјализират, бидејќи премногу седат дома и служењето на воениот рок ќе им овозможи да научат нови вештини, да научат да се дружат, да излезат од дома, да научат на заедништво, да вежбаат, да бидат поактивни, да научат нови вештини. Акцентот се става и на млади кои се заинтересирани за компјутери, за набавки, за менаџмент, тие вештини да ги доусовршат и да ги развијат. За да ги намами младите или морковот, мамецот, беше дека тие што ќе служат војска ќе добиваат препорака на јавните и на приватните претпријатија да имаат предност при вработување. Меѓутоа препораката не значи дека кој служел војска или кој учествувал во некоја од тие шеми го чека веднаш работно место – рече Скерлев.

За разлика од младите, повозрасните гласачи, оние над 65 години се согласуваат со идејата на Сунак.

– Противниците на Сунак, пак, велат дека ова е една налудничава идеја. Лидерот на либерал-демократите на извесен начин ја исмеа оваа идеја, нарекувајќи го очајнички обид. Имаше коментари кои јас ги гледав и ги читав на Твитер и на други социјални мрежи, во кои еден градоначалник на едно местенце во Северна Ирска вели: „Да дојдат тука и да ни кажат дека ќе ги земаат младите и ќе ги носат во војска?! Јас уште го чувам стапот зад врата и ќе видат што ќе се случи“. Реакциите на политичките структури се главно негативни, но не знаеме можеби во иднина ќе има некој начин, некоја вакво ангажирање на младите, доколку победат конзервативците, бидејќи тоа е едно од нивните предизборни ветувања – вели Скерлев.

Целиот разговор погледнете го во продолжение: