ВИДЕОИНТЕРВЈУ | Проф. д-р Маркоски: За четири години Македонија ќе го добие првиот агроном по дигитално земјоделство
![](https://www.slobodenpecat.mk/wp-content/uploads/2024/06/Capture-2.png)
Што значи дигитализација на земјоделство? Колку од младите се заинтересирани за студии по земјоделство? Во каква состојба ни е аграрот? Се грижиме ли доволно за производство на храна? Утрово одговор на овие прашања, во утринската програма на „Слободен печат“ побаравме од првиот човек на Факултетот за земјоделство и храна, деканот Миле Марковски.
Тој за септември годинава најави нова студиска програма, дигитално земјоделство. За програмата вели дека произлегла од постојана комуникација со стопанството и бизнис заедницата.
– Дојдовме до заклучок дека се потребни нови идеи, имплементација на нови студиски програми, коишто ќе бидат во корист и на образовниот процес и на стопанството, т.е. производството на храна и преработки од храна. Затоа во таа насока Факултетот за земјоделски науки и храна, заедно со Машинскиот факултет, ФИНКИ и ФЕИТ направи студиска програма за дигитално земјоделство, 4 годишен студиум, со 240 кредити, на којашто носител е нашиот факултет. Ние очекуваме дека ова студиска програма ќе побуди голем интерес кај средношколците, коишто сега полагаа државна матура-вели Маркоски.
Тој објаснува дека дигиталното земјоделство е нешто коешто е предвесник на она којашто допрва треба да се види во нашата држава, а тоа е осовременување на образовните процеси и осовременување на земјоделското производство.
– Дигитализација значи осовременување на механизацијата. Сега немате вие современа механизација од типот на современи трактори и приклучна механизација каде не е воведен GPS систем. Значи постојат современи машини кои се далеку посовремени од автомобилите коишто ги возиме, затоа што таму треба прецизност во самото земјоделство до перфекција, до крајниот производ. Тоа е прецизното земјоделство. Сето тоа се алатки коишто претходно беа користени и од земјоделските стопанства и од приватни земјоделци. Сега сакаме да создадеме кадар којшто точно ќе ги добие сите тие вештини за да паметно ги користи сите алатки-вели Маркоски.
Предвидено е да се запишат 50 студенти за оваа академска година. Но факултетот има и други програми.
![](https://www.slobodenpecat.mk/wp-content/uploads/2024/06/Capture1-300x205.png)
– Јас како декан сакам да ги убедам средношколците дека иднината е во земјоделството и во производството на храна. Сега почнавме постојано да комуницираме и со средните школи. И тоа е првиот начин за да ги привлечеме самите средношколци своето образование да го продолжат на нашиот факултет-вели Маркоски.
Тој објаснува дека целта на факултетот е да се воведе стручна пракса како задолжителен предмет.
-Праксата не е само добивање на потпис. Целта е студентот да ги научи сите алатки и да биде подготвен да се вклучи во производниот процес. Ние сакаме нашите студенти кои ќе дипломираат да стекнат вештини коишто директно ќе бидат презентирани во самите стопанства-вели деканот.
Тој објаснува дека сега има стручна пракса, кај што студентите во четврта година одат во стопанство или во фирма. Крајната оценка се формира заедно со менторот и професорот.
На прашањето како од производител на храна станавме увозно зависни, Маркоски вели дека бројот на население се намалува, соодветно се намалува и самото производството на храна.
– Но тоа не значи дека ние како земја, како факултет, како научен кадар не треба да апелираме дека, треба да го вратиме производството на храна која ни е потребна. Бројот на сточниот фонд во Македонија секоја година се намалува. Една од причините е цената, производството, друг фактор е човечкиот фактор. Нема население кој би се занимавало сега со такво производство-вели Маркоски.
Според него сите велиме дека Македонија,е аграрна држава, по дефиниција, но според бројот на хектари коишто ги располага нашата држава, со бројот на хектари на обработливо земједелско земјиште и не сме така аграрна држава.
-Ние имаме 16.200 хектари овоштарство, околу 32.000 лозови насади. Македонија е препознатлива во однос на квалитетот. Квалитетот на македонското јаболко квалитетот на македонскиот грав, кочанскиот ориз, прилепскиот тутун се производи по кои сме препознатливи-вели Маркоски.
Со деканот зборувавме за квалитетот на храната за употребата на пестициди.
Целото интервју погледнете го во продолжение: