Во Источна Македонија, но и подалеку оттаму, нема кој не чул за парохискиот свештеник отец Гоце Младеновски. Тој ја продолжува лозата како трета генерација од семејството која одгледува органски зеленчук и овошје и живее еден поинаков живот за поп. Покрај редовните работни обврски, отец Гоце слободното време го пополнува со даровите од природата кои максимално се труди да ги сочува со сите нивни вредности за периодите од годината кога не се достапни.

Во целиот процес му помага попадијата Божица. Специфични по имињата, отец и Божица, тие се раритет и како едно автентично радовишко семејство кое произведува палета од различни сушени производи. Целта е човекот да се врати на исхраната на нашите предци, како што вели отец Гоце за „Слободен печат“ , на разновидна органска храна во текот на целата година, со тоа што на овој начин, како што појаснува тој, производите што не виреат во тоа годишно време можете да ги јадете на овој начин.

– Сушењето е процес, треба да се знае точно кога и што се бере. На пример, сега е берба на босилекот, но не секое гранче, точно се знае кој цвет е зрел, а за тоа најмногу ни помагаат пчелите. Потоа, плодовите во сушницата се ставаат со прецизно исечена дебелина, на точна температура, секој прозвод различно се третира. На пример, морковот се суши најдолго – раскажува отец Гоце.

Ова хоби, кое му го исполнува секојдневието, го прави посреќен, тој е во постојан контакт со земјоделците, дел од плодовите ги одгледуваат сами, но дел ги купува.

– Ние работиме строго со органски производи, точно се знае ако некој производ не е органски, во сушницата наместо зелена ќе добиете црна боја на плодот. Јас многу лесно наоѓам луѓе кои произведуваат биолошки и од нив јас не откупувам, туку купувам! Нашите прозводи се од 50 до 150 грама и ако ве интересира, цените се пристапни, еден грам чини еден денар. Многумина се изненадени од тоа дека не е скапо – вели Малденовски.

Богата е палетата на производи кои ги нуди нивната тезга, од сушен патлиџан, пипер, кромид, компир, спанаќ, до превкусно сушени јаболка, круши, сливи…

– Имаме интерсни зачини кои можете да ги купите одделно во кесичка, но посебно сакам да го издвојам производот готова супа или чорба. Во една кесичка има десет видови зеленчук, само треба да го сварите и за неколку минути ќе добиете здрава и многу убава супа каква што нема во продовниците – вели тој.

Младеносвки произведуваат и сок, компот и чај.

– Во течна форма засега имаме три производи кои се мултивитамински, сочинети од повеќе производи на едно место. На пример, кај нас ќе пробате домашно безалкохолно мохито, содржи неколку свежи овошки помешани на совршен начин. Базата е од бозел, додадовме маточина, мента, лимон или портокал, без никакви шеќери и додатоци освен босилекот кој му дава убав изглед, но јас на крајот и ќе го изедам. Топло ги препорачувам и чајот и компотот кои имаат многу специфичен вкус. Секој од овие напитоци за овие топли денови ќе ве освежат, а дополнително и заситат – појаснува отец Гоце.

Целиот разговор погледнете го во продолжение: