Како поминува времето, полека се губат квалитативните вредности на музиката, музичките продавници и интересот за социјалните интеракции за музички дебати, одење на концерти, купување плочи, касети, дискови и слично.

Во Скопје, во срцето на Градскиот трговски центар, постои едно симпатично место преполно со љубов и посветеност. Со едно кафе покрај продавницата се отвораат долги разговори за музиката.

Таму е Симеон Митов – човекот што „дише“ со музиката. Голем поддржувач на новата генерација артисти, музички бендови и сопственик на култната музичка продавница „Рестарт“.

Митов е музички ентузијаст – така и го најавивме на самото интервју.

– Ова ми се допадна – музички ентузијаст. Никогаш не сум знаел да свирам, никогаш не сум знаел да пеам, и покрај сета желба – вели Митов.

Неговата љубов кон музиката почнува од мали нозе – со снимање песни на касети, слушање радио и откривање нови звуци.

– Тоа ми е првиот допир со музиката. Да посакам нешто да можам да го слушам одново и одново – ни објасни Митов.

Од видеоклуб до „Југотон“, со професионално минато, од голем број музички и културни проекти, и тоа уште од тинејџерски денови каде што во неговото маало Топаана, во неговата гаража водел видеоклуб „Квиско“.

Митов бил професор по филозофија во средното училиште „Јосип Броз Тито“, работел во продавница и издавачка куќа „Блоуап“ во Капиштец. Бил дел од тимот на „Рекорд рекордско“, издавач на македонски алтернативни изданија: „Пиколомини“, „Мугер Фугер“ итн.

А повеќе од две децении бил партнер и менаџер на легендарната издавачка куќа „Југотон“. – Речиси 30 години со „Југотон“.

-Поради сите тие мои ангажмани, стекнав многу пријатели, познанства, луѓе насекаде – вели Митов.

Неговата музичка продавница „Рестарт“ ја води заедно со сопругата Соња и нуди плочи, касети, дискови, маички, видеокасети и уметнички изданија.

– За мене значи тотално нов почеток. Истото што сум го работел со години, сега најпосле го работам сам за себе – додава тој.

Симе е голем поддржувач на независната музичка сцена и е поддршка за млади бендови во Македонија како „Кем“, „Харакири“, „Луфтанза“, „Фикшн“, „Ваџајна корпорејшн“ и уште десетици други.

– Во моментов се случува една ситуација каде што квалитетот и квантитетот заедно испливаа. Има голема сцена што стварно нуди невиден квалитет – вели Митов.

Неговиот фокус е да ги едуцира младите зошто и како да издаваат физички изданија – плочи и дискови и да им помогне да ги направат првите чекори.

– На младите бендови сакам да им објаснам зошто им треба физичко издание, како диск или плоча, и да им помогнам тоа лесно да го направат.

Иако го прифаќа дигиталното време, Митов додава дека звукот од диск или плоча се разликува од тој „онлајн“.

– Луѓето веќе не забележуваат разлика. Кога пуштив цеде и истата песна на Спотифај – разликата беше огромна – вели тој.

Затоа препорачува враќање на концертите, купување музички изданија и дружење преку звук.

– Оставете ги телефоните. Излезете, одете на концерт, дали е филхармонија или уличен бенд – тоа е духовна храна – вели Митов.