Марио Манески е млад сликар од Кичево, кој својата љубов кон уметноста ја открил уште во детството. Од рана возраст, Манески започнал да црта и да се изразува преку илустрации и улични графити.
Но, неговата вистинска уметничка патека започнува со преминувањето на платно.

Марио ни раскажа за моментот кога почувствувал потреба да се докаже и да вложи уште повеќе труд во своето уметничко образование.

-Кога бев VII одделение, професорот по ликовно ми стави четворка наместо петка со назнака дека сум бил слаб во аспектот на креативност. Јас му го докажав спротивното – објаснува Манески за „Слободен печат“.

Тој започнал да црта графити, а потоа и да слика на платна. Секое ново платно како нова етапа го има збогатено неговиот уметнички правец, во еден минималистички стил, експресионизам, движења, бои и форми.

Во 2019 година, Манески ја одржал својата прва самостојна изложба наречена „Тефтер“. А потоа поголема изложба во 2022 година, во Кафе бар „Че“, каде што целокупниот простор на локалот го претворил во уметничка галерија.

Токму овие искуства го поттикнале да продолжи да создава и да работи на своето уметничко портфолио.

– Транзицијата од графити и дела на платно ми беше благодарение на советите од многу луѓе дека сликите се многу добри и дека имам потенцијални купувачи – објаснува Манески.

Секое ново дело му носи нови можности и нови контакти, а уметноста за него е начин да комуницира со светот.
Во моментов, Манески работи на својата трета самостојна изложба, која ќе биде уште еден важен чекор во неговата уметничка кариера.

Покрај сликарството, Манески има и љубов за велосипеди кои ги акцентира како илустрации во повеќето од неговите дела.

-Љубовта кон велосипедите се појави како инает кон моите. Имав голем велосипед со преголема рамка за мене. Но родителите ме убедуваа дека ми е таман. Но не ми беше. Ги молев да ми купат велосипед што е за мене – се сеќава тој на своите детски денови.

Покрај велосипедите, од семејството Манески ја носи и љубовта кон угостителството, бидејќи поминувал многу време во локалот на неговите родители, а тоа му била дополнителна инспирација за креирање на нови дела.

-Угостителството е животно училиште и не планирам да скршнам од тој пат – вели Манески.

Тој планира да создава и уникатни уметнички предмети, како чашки за еспресо, чадори и други парчиња, кои ќе бидат вметнати во секојдневниот живот.

Неговата уметност за создавање се заснова врз целокупните искуства на животот, како и вербата дека има простор за напредок и усовршување.