Во пресрет на годинешното шоу „Глумците пеат“, кое ветува одлична забава, тематска вечер, многу музика, забава и смеа, во утринската емисија „Слободен печат“ зборувавме со Маја Бабиќ, организаторка и продуцентка на настани. Маја втора година по ред ја организира манифестацијата, како аманет од нејзиниот татко Марин Бабиќ, кој е и творецот на „Глумците пеат“, и како што самата вели, сите се пријатно изненадени од позитивните реакции на публиката.

– Среќни сме што успеавме да ги вратиме „Глумците пеат“ во овие времиња-невремиња, што успеавме во кратко време повторно да ја разбудиме љубовта, енергијата, желбата кај глумците за ова шоу и тоа мислам дека е најголемиот успех. Она што навистина нѐ восхити минатата година е одѕивот на публиката и на јавноста. Во моментот кога објавивме дека „Глумците пеат“ се враќаат, буквално бевме преплавени од убави коментари на социјалните мрежи, што е реткост во последно време. Тоа само покажува дека во вистинско време сме ја вратиле целата приказна. На народот му недостасува забава, смеење и убави нешта – вели Бабиќ.

Оваа година глумците ќе пеат на сцената на Националната опера и балет две вечери, на 29 и 30 март, што значи дека повеќе луѓе ќе имаат можност да го проследат шоуто.

– Не верувам во елитистичка култура, сакам сѐ повеќе луѓе да го видат шоуто, но, за жал, ние немаме сала каде што можеме еднаш да го направиме тоа и да биде така како што било оригинално замислено. Националната опера и балет е фантастична сцена, единствена што ни одговара на потребите, а да не зборувам за менаџментот, кој навистина ни излегува во пресрет за сѐ што правиме таму, но аудиториумот за жал е премал и затоа направивме две вечери, иако е тоа логистички многу покомплицирано – објаснува Маја.

Четириесетина глумци, дваесет музичари и уште триесет луѓе во заднина ќе се потрудат да ја однесат публиката на посебно место, каде што ќе заборават на секојдневието и ќе му се препуштат на уживањето во добрата песна и смеа.

– Татко ми, на времето во 1992/93, направил концепт, за кој речиси сум сигурна дека не знаел до каде ќе отиде и што ќе направи. Ова е продукција што навистина на глумците им овозможува да излезат надвор од секојдневните обврски. Дадена им е слобода сами да си го осмислат настапот, од кој агол сакаат да го презентираат, дали песната ќе биде копирана или ќе ја направат пародија. Тие сами предлагаат кои костими да ги носат, така што имаат слобода, која на тие креативци очигледно им годи. Интересно е што на сцената се собираат луѓе, кои веројатно природно никогаш нема да заиграат заедно на сцена, од различни театри, различни генерации, можеби никогаш нема да бидат во истата поделба за претстава, а тука соработуваат. Тие понекогаш и се запознаваат тука, ние кога го направивме првиот состанок, имаше глумци кои знаат дека постојат, меѓутоа, првпат се запознаваат.

Годинешниот слоган на манифестацијата гласи „Нема да одиме на Евровизија, но таа доаѓа кај нас“, што значи дека веројатно ќе имаме можност да се потсетиме на некои од најголемите евровизиски хитови.

– Македонија годинава одлучи да не оди на Евровизија, ама ние, не би биле ние, ако не решиме Евровизија да дојде кај нас и мислам дека слоганот кажува сѐ. Нема да откријам до крај, ќе биде интересно, смешно, ќе се пошегуваме и на наша сметка, но и за многу други работи – вели Бабиќ.

Целото интервју со Маја Бабиќ погледнете го на следниот линк: