– Според мене е несериозно да не излегува човек да гласа, но некогаш неминовно доаѓа до такви периоди и квазиапатични ситуации во демократија. Мислам дека соседите наши ги имаат поминато тие болести. Не знам кај нас дали се поминати, но мислам дека не – рече писателот Дарко Лешоски во утринската емисија „Слободен печат“ во соработка со ЦИВИЛ Медиа и Трн.мк.

Тој додаде дека човекот мора самиот пред себе да биде чист и да излезе и да рече: ова е вака затоа што јас направив погрешен избор со минатото гласање и обратно.

– Физички сме веќе во ЕУ, тоа е исто како да ме прашаш дали јас се викам така или ти се викаш поинаку. Колку и да звучи шалабајзерски, не може да е Грција во Европа, Бугарија, Србија и Албанија се стремат натака, ние да фантазираме и да се стремиме кон нордиски народи – заклучи Лешоски.

– „Поет“ мора да признаам ми е многу нереален збор за ова наше секојдневие. Многу ми е полесно, тоа ми е одамна прифатено, да се перцепирам себеси само како медиум. Не сметам дека сето тоа е мое, мислам дека доаѓа од некаде, нешто. Тоа ме користи мене да помине низ мојот мозок и да излезе. Не сметам дека е мое, не се сметам со тоа его на творец – изјави Лешоски.

Тој додаде дека нема ритуали кои го инспирираат да пишува.

– Таа перцепција си доаѓа сама од себе, кога ќе и дојде и не те прашува – рече Лешоски.

Во однос на Вевчанскиот карневал, тој посочи дека карневалот по дефиниција е контроверзија.

– Да не навредам народ, мислам дека имаме регрес во тој поглед. Многу порано, полиберално се гледало на таа критика и потсмев, а сега некако луѓето се постегнати и на се гледаат како личен напад, без да се земе предвид дека самите тие маски се еден вид потсмев пред сè, самите на себеси, како општество, понатаму и таргетирано некоја критика. Одиме во некој регрес во смисла на тоа дека кога ќе заборавиме да се шегуваме, да се смееме, тоа е страшно – смета Лешоски.

Целото интервју со Лешовски можете да го погледнете во продолжение: