На 19 јуни 1959 година се основал Техничкиот факултет во Скопје, кој е зародиш на Технолошко-металуршкиот факултет. Со пригодна прослава, на која се сретнаа претставниците од првите генерации на факултет, беше одбележана годишнината.

За тоа што низ годините претставуваше овој факултет, но и за тоа каков е интересот на сегашните генерации да бидат инженери, разговаравме со деканот Стефан Кувенџиев, кој гостуваше во утринската програма „Слободен печат“.

Кувенџиев откри еден интересен податок – индексот број 1 на Технолошко-металуршкиот факултет го имала професорката Радмила Кипријанова.

– На Технолошко-металуршкиот факултет имаме и голем број дипломирани, магистрирани и докторирани металурзи и технолози, кои во, условно кажано, едни несигурни времиња се одважиле да го понесат бремето на основоположувањето на современото стопанство, на современиот индустриски развој и воведувањето на основите принципи на технолошкиот развој и подоцнежното развивање на современата држава – вели Кувенџиев.

Но, за жал, во последно време Факултетот има благ пад на студенти. Сепак, деканот вели дека тоа не ги обесхрабрува, и тие и понатаму работат на актуализирање на инженерската струка.

 Преземавме серија активности што се насочени кон актуализирање не само на факултетот што е со високо реноме, туку и на актуализирање на значењето на струката што добива сè повеќе на значење во последно време во светот, во Европа, и секако во Македонија – вели Кувенџиев.

Тој посочува и дека Технолошко-металуршкиот факултет негува долгогодишна соработка со многу компании.

– Нашата соработка не се состои само во реализирање некои проектни активности, или апликативна дејност. Напротив, основата на нашата соработка е во наставно-образовната дејност на факултетот. Имаме соработка со многу компании во насока на обезбедување стипендии, во насока на вклучување на инженерите што се со богато искуство во организирање на клиничката настава на факултетот, организирање теренска настава и теренски посети на нашите студенти и, конечно, постигнување една кохезија на апликативниот, односно на инженерскиот аспект и на академскиот аспект. Исто така, образованието почнува на факултет, но не завршува со факултетот и трае доживотно. И ние имаме таков пристап и затоа нудиме обука на кадар на компаниите – вели деканот.

Она што е рак-рана на општеството – одлив на млад кадар – е судбина што го следи и овој факултет. Па, така, деканот вели дека има дипломци што биле одлични студенти, а кои поради професионални и економски причини си заминале од земјава.