Имаат ли посвоените деца право да ги запознаат своите биолошки родители? Дали треба да знаат дали имаат браќа и сестри и кои се тие? Колку инцестни бракови се склучени во Македонија поради тоа што браќа и сестри биле раздвоени при посвојување се само дел од прашањата на кои одговор побаравме од Илија Јовановиќ, претседател на здружението „Градиме иднина“. Во емисијата „Слободен печат“ тој вели дека неодамна започнал нов проект за да ја олесни судбината на посвоените деца. Целта на проектот е спој на биолошките родители и децата, но и на браќата и сестри раздвоени при посвојување.

Илија е поранешен штитеник од домот за доенчиња и мали деца Битола, каде што бил сместен до петтата година од животот, кога го префрлиле во Домот 11 Октомври во Скопје.

Тој ги познава родителите, но вели дека бил одземен од државата затоа што неговата мајка била болна, а татко му бил алкохоличар. Знае за себе дека има полубрат но не знае кои му се роднините.

– Посвоените деца, тие што се во згрижувачки семејства и домови немаат законско право да ги знаат нивните биолошки родители. Имаме само една хартија кога си дошол и кога си излегол од домот. Според Устав сите ние имаме право да ги знаеме родителите, но Законот за семејство нам не ни го дозволува тоа. Затоа активираме петиција и акција истиот да се смени. Регистар на посвоени деца има, но децата немаат увид во него-вели Јовановиќ.

Тој објаснува дека незнаењето за тоа кои ни се родители и роднини е децениски проблем. Во ЕУ над 90.000 посвоени деца ги бараат своите родители. Во моментов Илија раскажува успешна приказна за дете кое ги нашло својата мајка и брат и сестра во тиквешко. Но има и такви родители и роднини кои и кога ќе се сретнат негираат дека имаат дадени деца на посвојување.

– Во Македонија има три групи кои функционираат на социјални медиуми. Преку медиумите ги бараат своите браќа и сестри, но и братучеди и секако родители. Во овој случај над 25 години братот ги бараше неговите браќа и сестрата. За среќа приказната завршува успешно. Во Македонија околу 150 деца ги бараат родителите на социјални мрежи-вели Јовановиќ.

На прашањето дали и колку бракови има склучено помеѓу браќа и сестри кои биле раздвоени и посвоени, Јовановиќ вели дека се петнаесетина. Но не се знае колку бракови има со први или втори братучеди бидејќи децата кои се посвоени не си го знаат кругот на семејството.

– Морници ме лазат сега и мене бидејќи имам деца, а немам информација кои се моите први и втори братучеди. Браќа и сестри кои завршиле во брак во земјава се од 10 до 15. Но мислам дека дополнително ќе се зголеми бројката кога ќе почнат децата кои се посвоени да ги наоѓаат братучедите од едната и другата страна. Од Велес брат и сестра одвоени при посвојување едното дадено кај едно семејство, другиот кај друго семејство стапуваат во љубовна врска и во брак. Страшно, вели Јовановиќ.

Целта на неговиот проект е да се прекинат овие врски и бракови.

– Јас во моментов ги барам моите први братучеди се со цел да не се случи и моите деца да влезат во некоја таква љубовна врска. Знам дека имам полубрат, но не ги знам моите роднини. Сега трагам по мојот корен за да ги заштитам децата и од наследни болести. Јас сум сега изградена личност. Ако сакале роднините да ме видат и запознаат сигурно ќе ме запознале. Не барам ниту имот, ниту наследство. Сакам само децата да знаат дека имаат роднини и кои се тие. Да не дозволиме вакви врски да постојат и да завршуваат онака како што не треба-вели Илија.

Со него разговаравме и за документот кое го добива детето кога ќе наполни 18 години, за предрасудите кои ги имаат децата кои се посвоени.

Целото интервју погледнетевго во продолжение: