Актуелниот градоначалник на Кисела Вода, Орце Ѓорѓиевски не го гледа како конкуренција во трката за нов скопски гардоначалник министерот за локална самоуправа Златко Перински. Ѓорѓиевски е убеден дека тој ќе биде изборот на ВМРО-ДПМНЕ како кандидат за прв човек на главниот град.

– Перински, како и останатите во мојата политичка партија се луѓе со коишто јас сум пораснал во партијата, јас сум од 14-годишна возраст во ВМРО-ДПМНЕ, сите сме блиски соработници, пријатели. Наша заедничка цел е да го поразиме СДСМ и да ги направиме вистинските промени за да го направиме градот Скопје поубаво место за живеење – вели Ѓорѓиевски за „Слободен печат“.

На Скопје му треба темелна „генералка“ и како што вели Ѓорѓиевски, конечно решение за јавниот сообраќаен превоз.

– На Скопје му фали генералка. Состојбата на јавната чистота не е на завидно ниво веќе подолго време. Скопјани се жалат, особено кога е топло дека контејнерите се преполни. Нефункционален ни е градот од тој аспект, односно нема еден булевар, една улица, едно место, микролокација околу контејнерите којашто е соодветно исчистена. Она што прво му недостасува на градот е да се исчисти, да се направи добра генералка, да се започне со процес каде што ќе се таргетират сите диви депонии и истите ќе се исчистат за многу кратко време, но да не се чистат по принципот денес ги чисти градот, па за 10 дена повторно исто, туку долгорочно да се решат, по примерот, како што тоа го направивме во Кисела Вода – вели Ѓорѓиевски.

Една од најболните точки за главниот град е и ЈСП, за кое Ѓорѓиевски веќе има план во соработка со Министерството за транспорт и врски.

– ЈСП е моментално најголемиот проблем за граѓаните, таму треба набавка на нови автобуси, но би се земал предвид и предлогот на министерот за транспорт околу лесно метро. Тоа е проект кој според мене заслужува сериозно внимание и тоа е проект во кој градот Скопје ќе може да интервенира заедно со владата и со Министерството за транспорт и врски. Многупати во минатото се споменувале метроа, трамваи, но ништо не било реализирано, единствено што се правело е што се купувале автобуси, но обновување на возниот ред не го решава проблемот – рече тој.

Дигитализацијата – решение за корупцијата

Кисела Вода е првата дигитализирана општина во Македонија и пошироко, вели Ѓорѓиевски и додава дека во борбата со корупцијата тоа е неопходно да се направи системски во целата држава.

– Корупција има секаде. Честопати апелирам до секој од граѓаните кој ќе се соочи со таков проблем, да биде охрабрен и да го пријави случајот. Како општина, сериозно започнавме процес на дигитализација и во тие реформи може да се каже дека ние сме водечки во Балканот. Дигитализацијата како реформа треба забрзано да се одвива не само во нашата општина, туку и во целиот систем во државата. На пример, за уписот во градинките, во минатото во нашата општина, можеше единствено да се случи ако се познавате со градоначалникот, ако се познавате со директорката на градинката или со некој од службениците, па може да ја заврши таа работа. Она што го направивме ние, воведовме систем во којшто електронски се аплицира и се оди по приоритет – вели тој.

Во моментов 20 дечиња од Кисела Вода се на листата за чекање да добијат место во градинка, за разлика од пред три години, како што вели Ѓоргиевски, кога бројката беше 450 деца.

Во врска со нападите од страна на лидерот на Левица, Димитар Апасиев, кој ги обвинува градоначалниците од ВМРО – ДПМНЕ дека ги штитат загадувачите, алудирајќи на Цементарница УСЈЕ, Ѓорѓиевски вели дека не сака да го коментира потпросечното комуницирање на Апасиев и дека тие не се надлежни да делуваат.

– Беспредметно е да говориме за човек кој само на ваков начин знае да комуницира со јавноста на едно потпросечно ниво. И не би навлегувал повеќе околу неговата психичка состојба, но има соодветни лица во државата, доктори, да бидам попрецизен, коишто можат да го квалификуваат неговиот начин на делување и психичката состојба во којашто се наоѓа. Оној кој ја издал дозволата за работа на Цементарница УСЈЕ е надлежен да делува во истата институција. Ние, она што го преземавме како чекор беше поставување на мерна станица во дворот на цементарница Усје. Апасиев вака како гласноговорник, освен што знае да пишува фејсбук-статуси, не знам што направи изминативе години, откако живее на товар на граѓаните и зема пари – рече Ѓорѓиевски.

Во интервјуто со градоначалникот зборуваме и за новите капитални инвестиции, за ритејл-паркот кој ќе се гради во Пинтија и за тоа доколку се гради нова населба во непосредна близина на паркот, како тоа ќе се одрази врз притисокот на водоснабувањето и напојуањето на елекричната енергија на населението, како и за инфраструктурниот проблем – пристапот до домовите и викендичките на граѓаните.